Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել - VNews
Բաժիններ

Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

EHji1WLXUAA9n6p - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Աֆրիկացի շատ և շատ տղաներ ամեն օր քնում ու զարթնում են ֆուտբոլիստ դառնալու և փառքի հասնելու երազանքով: Դա ոչ միայն մասնագիտական հաջողության հասնելու ձգտում է, այլև սոցիալական «վերելակով» բարձրանալու մղում: Այդ ճանապարհն արդեն վաղուց անցնում է նաև Հայաստանով: Բազմաթիվ են խաղացողները, որոնց համար մեր երկրում հանդես գալը ցատկահարթակ է եղել՝ հետագայում ավելի հզոր ֆուտբոլային առաջնություն տեղափոխվելու համար: Նիգերիացի Իսահ Ալիյուն, թեպետ ընդամենը 21 տարեկան է, արդեն հասցրել է ֆուտբոլի շնորհիվ աշխարհը «ոտնատակ տալ»՝ ունենալով թե՛ վերելքներ, թե՛ վայրէջքներ: Կարիերան ֆուտբոլիստին այժմ Երևան է հասցրել, բայց մինչ այդ հետաքրքիր է ծանոթանալ նրա անցած ճանապարհին:

Ալիյուն ծնվել է 1999 թվականին Նիգերիայի Կադունա քաղաքում: Նրա ու ֆուտբոլի «հանդիպումը» սեր է եղել առաջին հայացքից․ «Սկսեցի ֆուտբոլ խաղալ, երբ դեռ երեխա էի: Շատ հաճախ էի խաղում եղբայրներիս հետ փողոցում՝ առանց կրելու խաղակոշիկներ: Շատ լավ եմ հիշում այդ օրերը: Հասկանում էի, որ ֆուտբոլն ավելին է, քան պարզապես գնդակին հարվածելը: Այն միավորում էր մեզ, օգնում նոր կապեր հաստատել: Այդ ժամանակվանից էլ սկսել եմ մտածել պրոֆեսիոնալ դառնալու մասին: Մանուկ հասակից երկրպագել եմ «Արսենալին»: Ինձ ոգեշնչել է հատկապես հայրենակցիս՝ Նվանկվու Կանուի, և Թիերի Անրիի ցուցադրած խաղը»,- հիշում է Ալիյուն:

20479467 900497716755105 222197993416551388 n - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Նա 2 տարի ծառայեց բանակում, իսկ այսօր հավաքականի առաջատարներից մեկն է․ Տիգրան Բարսեղյանի պատմությունը

Տղան ֆուտբոլային առաջին քայլերը կատարեց Կակուրիի ֆուտբոլային ակադեմիայում, իսկ 2016 թվականին միացավ «Ռեմո Սթարս» ակումբին: Այն նույն տարում նվաճեց Նիգերիայի Բարձրագույն խմբի առաջնության ուղեգիր: Ճիշտ է, «Ռեմո Սթարսը» չամրապնդվեց այնտեղ ու առաջին իսկ տարում լքեց ուժեղագույնների մրցաշարը: Հարձակողական ոճի կիսապաշտպան Ալիյուն, համալրելով գլխավոր թիմը, հասցրեց 3 խաղ անցկացնել երկրի բարձրագույն դիվիզիոնում: Սակայն նրան վիճակված չէր շարունակել ելույթները հայրենիքում: Իսահը հանդիպեց մի մարդու, որ փոխեց նրա ֆուտբոլային ճակատագիրը:

«Ցուրտ» Վանաձոր, չեմպիոնություն, փայլուն խաղ և «աղմկահարույց գործարք»

Դավիթ Աբրահամյանը Հայաստանի ամենահայտնի ֆուտբոլային գործակալներից մեկն է: Նրա շնորհիվ հայկական ակումբներում են խաղացել և փայլատակել այնպիսի ֆուտբոլիստներ, ինչպիսիք են Սերժ Դեբլեն, Դիդիե Բորիս Կադիոն, Ֆոֆանա Բեկոն, Լուբամբո Մուսոնդան, Լամին Լի Յորոն, Էբուե Կուասին ու շատ-շատ ուրիշներ: Աբրահամյանի հաճախորդներից շատերը Հայաստանից հետո տեղափոխվել են եվրոպական շատ ավելի բարձրակարգ առաջնություններ: Հենց նրա շնորհիվ Իսահ Ալիյուն 2018 թվականի փետրվարին տեղափոխվեց Հայաստան՝ վերակազմավորված Վանաձորի «Լոռի», որը դեռ հանդես էր գալիս Առաջին խմբի առաջնությունում: Ի դեպ, Աբրահամյանը վանաձորցի է, թեև երկար ժամանակ ապրել ու աշխատել է Ռուսաստանում:

David - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել
Դավիթ Աբրահամյանը՝ աջից

«Ալիյուին տեսա 2017 թվականին Նիգերիայի Լագոս քաղաքում կայացած եռօրյա փոքր մրցաշարի ընթացքում: Նա առանձնացավ գնդակի հետ լավ աշխատանքով և ոչ ստանդարտ մտածելակերպով: Նիգերիայում նրա նախկին ակումբի սեփականատիրոջն էր պատկանում նաև Պորտուգալիայի Բարձրագույն խմբի «Ֆեյրենսե» ակումբը, նրանք պլանավորում էին Ալիյուին ուղարկել այդ ակումբի երիտասարդական թիմ: Ֆուտբոլիստին որոշ ժամանակ անց մերժել էին շենգեն վիզա տրամադրել, ինչից հետո ինձ հաջողվել էր նրանց համոզել ընտրել «Լոռի» տեղափոխվելու տարբերակը»,- հիշում է Աբրահամյանը: «Երբ եկա Հայաստան, ոչինչ չգիտեի երկրի մասին: Միայն գիտեի, որ այն կոչվում է Armenia: Ժամանեցի Վանաձոր, երբ մրցաշրջանի ձմեռային հատվածն էր: Ցուրտ եղանակ էր, ձյուն, և ես սովոր չէի դրան, բայց մարզչի ու խաղընկերներիս օգնությամբ արագորեն հարմարվեցի այդ ամենին: Մտածեցի, որ «Լոռի» տեղափոխությունը լավագույն ընտրությունն էր կարիերայիս զարգացման համար»,- պատմում է Ալիյուն:

Հարմարվելու գործընթացը շատ կարճ տևեց: «Լոռիում» քիչ չէին աֆրիկացի խաղացողները, ինչը հեշտացրեց ինտեգրվելու խնդիրը: Ալիյուն դարձավ կարևոր ֆուտբոլիստ, անցկացրած 14 խաղում իր ակտիվում գրանցեց 3 գոլ և 6 արդյունավետ փոխանցում ու օգնեց թիմին դառնալ Առաջին խմբի 2017/18թթ․ առաջնության չեմպիոն՝ նվաճելով Բարձրագույն խմբի ուղեգիր: Այդ ամենում մեծ էր գլխավոր մարզիչ Արմեն Ադամյանի ներդրումը․ «Նա ինձ ազատություն տվեց խաղադաշտում: Միշտ շնորհակալ կլինեմ Արմեն Ադամյանին ինձ հավատալու և ընձեռած հնարավորությունների համար: Նա ամբողջապես փոխեց իմ խաղաոճը»,- նշում է Ալիյուն:

img 20180526 wa0005880515853 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Նա թողել էր ֆուտբոլը և անցել ծառայության, իսկ հետո դարձավ հավաքականի ամենակայուն ֆուտբոլիստներից մեկը․ Արտակ Գրիգորյանի պատմությունը

Վանաձորյան թիմի մուտքը Բարձրագույն խումբ շռնդալից էր: Թիմը մեկնարկային 11 մրցավեճում տոնեց 7 հաղթանակ և կրեց ընդամենը 2 պարտություն: «Լոռին» շատ վառ խաղ էր ցուցադրում, թիմում, Ալիյուից զատ, առանձնանում էին նաև Ջոնել Դեսիրեն, Ուգոչուկվու Իվուն, Վիգեն Ավետիսյանը, Նանա Կվամե Անտվին, Աննան Մենսահն ու ավագը՝ Արտյոմ Խաչատուրովը: «Բոլորս իրար շատ լավ էինք հասկանում ոչ միայն խաղադաշտում, այլև հանդերձարանում: Երաժշտություն էինք լսում, կատակներ անում, կարծես մեկ մեծ ընտանիք լինեինք, բոլորն ազատ էին միմյանց հետ շփման ժամանակ»,- հիշում է Ալիյուն: Թիմին մեծապես օգնում էր նաև երկրպագուների մեծ ու հավատարիմ բանակը: Սակայն մրցակիցներն աստիճանաբար հարմարվեցին «Լոռիի» խաղաոճին և առանձին ֆուտբոլիստներին, ինչից հետո դժվարություններ առաջացան: Ձմռանը տեղի ունեցավ մարզչական փոփոխություն: Վանաձորցիները հասան գավաթի եզրափակիչ, որտեղ ինքնագոլով պարտվեցին «Ալաշկերտին», իսկ առաջնությունում չմտան եվրագավաթային գոտի՝ եզրափակելով լավագույն հնգյակը:

Ալիյուի համար մրցաշրջանն անհատական տեսանկյունից հրաշալի ստացվեց: Նա խաղում էր «10 համարի» դիրքում, կառուցում ու հաճախ նաև եզրափակում թիմի գրոհները: Գերազանց դրիբլինգին զուգորդվում էր նաև ստեղծարար միտքն ու մրցակիցներին իր որոշումներով անակնկալի բերելու ձիրքը: Առաջնությունում անցկացրած 29 հանդիպումներում (բոլորում էլ՝ մեկնարկային կազմում) դարձավ 7 գոլի և 6 արդյունավետ փոխանցման հեղինակ: Տաղանդաշատ ֆուտբոլիստով շատերը սկսեցին հետաքրքրվել: Նոր մրցաշրջանում 3 մրցավեճ անցկացրեց «Լոռիում», ինչից հետո ակումբը հայտարարություն տարածեց․ «Տրանսֆերային պատուհանի վերջին ժամերին «Լոռին» իրականացրեց հերթական աղմկահարույց գործարքը։ Իսպանական «Ալմերիա» ակումբը ձեռք բերեց կիսապաշտպան Իսահ Ալիյուի տրանսֆերային իրավունքները»:

40595669 2087631917937962 1292679847792869376 o 960x640 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Իսպանական երազանք, որը բախվեց դառն իրականությանը

«Լոռին» մինչ այդ ևս մեկ ուշագրավ գործարք էր կյանքի կոչել․ պաշտպան Նանա Անտվին վարձավճարով տեղափոխվել էր ֆրանսիական «Լիլ»: Իսպանիայի Սեգունդայի ներկայացուցիչ «Ալմերիան» 140 հազար եվրո վճարեց վանաձորյան ակումբին Ալիյուի տրանսֆերի դիմաց, «Լոռին» հաջորդ վաճառքից պահպանեց նաև 20% մասնաբաժին: «Մրցաշրջանի ավարտից հետո շատ առաջարկներ ունեի Ֆրանսիայից, Եգիպտոսից, Ռուսաստանից և Իսպանիայից, սակայն Պիրենեյան թերակղզում խաղալն իմ երազանքներից մեկն էր, ու «Ալմերիան», բարեբախտաբար, ավելի մեծ հետաքրքրություն դրսևորեց, քան մյուս ակումբները»,- ասում է նիգերիացի ֆուտբոլիստը: Դավիթ Աբրահամյանը հավելում է․ «Ալմերիան» այդ ժամանակ կատարեց ամենակոնկրետ առաջարկը: Որոշիչ գործոններն էին ակումբի մակարդակը և ֆուտբոլիստի՝ Իսպանիա տեղափոխվելու ցանկությունը»:

Բայց Ալիյուի համար իսպանական արկածը վերածվելու էր խոչընդոտներով լի մի փուլի: «Ուշ ժամանեցի Իսպանիա, քանի որ ստիպված էի վերադառնալ Նիգերիա ու աշխատանքի թույլտվություն ստանալ: Բաց թողեցի մրցաշրջանի առաջին 2-3 ամիսները, «Ալմերիային» միացա միայն հոկտեմբերի վերջին»,- նշում է ֆուտբոլիստը: Նիգերիացին 2019 թվականի նոյեմբեր-դեկտեմբեր ամիսներին 6 հանդիպում անցկացրեց «Ալմերիայի» երկրորդ թիմում՝ միայն 2 անգամ հայտնվելով մեկնարկային կազմում, կատարելով 1 գոլային փոխանցում: «Ալմերիայի» առաջին թիմի գլխավոր մարզիչ, պորտուգալացի Էմանուել Պեդրուն, որը ժամանակին որպես պաշտպան 120 խաղ էր անցկացրել «Պորտուի» կազմում, երիտասարդ Ալիյուին հնարավորություն տվեց նաև մի քանի մարզում անցկացնել գլխավոր թիմի հետ: Մասնագետը նաև զրուցում էր ֆուտբոլիստի հետ ու բացատրում՝ ինչպիսի ֆուտբոլ է ցանկանում տեսնել նրա կատարմամբ:

EOp hkVXUAUpMd9 960x720 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

«Սարգիս Ադամյա՞ն․ չեմ ճանաչում»․ Ի՞նչ ուղի է անցել Մխիթարյանից հետո մեր այսօրվա գլխավոր աստղը

Ալիյուի բախտը չբերեց նաև նրանով, որ Պեդրուն նոյեմբերին հեռացվեց գլխավոր մարզչի պաշտոնից: Նրան փոխարինեց Մադրիդի «Ռեալի» լեգենդար կիսապաշտպան Խոսե Մարիա Գուտին, որի համար «Ալմերիան» պրոֆեսիոնալ թիմ գլխավորելու առաջին փորձն էր: «Ալմերիայում» քաղաքականության փոփոխություն տեղի ունեցավ, ինչի հետևանքով Ալիյուն դադարեց մարզումներ անցկացնել գլխավոր թիմի հետ և ստվերում հայտնվեց: 2020 թվականի հունվարի 12-ին «Մարասենայի» դեմ կայացած խաղը երիտասարդ նիգերիացու համար վերջինն էր նաև «Ալմերիայի» երկրորդ թիմում: «Մի օր մարզվում էի երկրորդ թիմի կազմում և զանգ ստացա իմ գործակալից: Նա ինձ ասաց՝ «Ալմերիայից» իրեն տեղեկացրել են, որ Սաուդյան Արաբիայից մի թիմ հետաքրքրված է իմ ծառայություններով և ուզում է պայմանագիր ստորագրել ինձ հետ, իսկ «Ալմերիան» ցանկանում է բաց թողնել ինձ»,- պատմում է Ալիյուն:

Դավիթ Աբրահամյանը շատ ավելի մանրամասնորեն է տեղյակ՝ ինչու իսպանական ակումբը որոշեց ընդամենը կես տարի անց բաժանվել Ալիյուից: ««Ալմերիան» պատկանում է Սաուդյան Արաբիայից մի շեյխի, ակումբում սկսվեց ամեն ինչ լրջորեն փոխվել: Գուտիին նշանակեցին գլխավոր մարզչի պաշտոնում: Ակումբը ցանկանում էր Լա Լիգա բարձրանալ, շատ մեծ գումարների դիմաց հրավիրեցին անվանի նորեկների: Ակումբն այդպիսով խնդիրների առնչվեց Ֆինանսական Արդար խաղի հետ կապված, և որպեսզի չկիրառվեին պատժամիջոցներ, որոշեցին վաճառել մի քանի ֆուտբոլիստի: Սաուդյան Արաբիայի ակումբից Ալիյուի տեղափոխության համար արված 400 հազար եվրոյի առաջարկը տվյալ իրավիճակում շահավետ տարբերակ էր «Ալմերիայի» համար»:

EOJjZ2vX4AA0tQ5 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Իսկ Ալիյուն մինչ այդ արդեն սկսել էր նաև իսպաներեն սովորել՝ երկրին ավելի լավ հարմարվելու համար․ «Կարծում եմ՝ ավելիին էի արժանի: Աստիճանաբար հարմարվում էի միջավայրին, և գործերը սկսում էին լավ ընթանալ: Գործում էի ինձ հոգեհարազատ խաղային դիրքում: Տրանսֆերի մասին չեմ զրուցել գլխավոր մարզչի հետ: Խոսել եմ միայն մարզական տնօրենի հետ: Չէի ասի, թե այժմ զղջում եմ «Ալմերիա» տեղափոխության համար: Իսպանիայում խաղալը հիանալի փորձ էր: Այդ ֆուտբոլային մշակույթը նոր էր ու տարբերվող ինձ համար: Շատ գոհ եմ, որ նման փորձառություն ստացա»: Կիսապաշտպանը 2020 թվականի հունվարին տեղափոխվեց Սաուդյան Արաբիայի «Ալ Շոլա» ակումբ, որը հանդես էր գալիս երկրի Առաջին դիվիզիոնի առաջնությունում (հեղինակությամբ երկրորդ մրցաշար): Ի դեպ, «Ալմերիան» այդ մրցաշրջանում չնվաճեց Լա Լիգայի ուղեգիր, իսկ Գուտին հունիսին պաշտոնանկ արվեց:

«Այնտեղ շատ դժվար է առաջադիմելը որպես ֆուտբոլիստ»

Ալիյուի փորձություններն այդքանով չէին ավարտվելու: Նա կարճ ժամանակահատվածում ևս մեկ «աշխարհ» հայտնաբերեց իր համար հայրենիքից, Հայաստանից ու Իսպանիայից հետո: Սաուդյան Արաբիայի ֆուտբոլը շատ է տարբերվում իսպանականից: «Այդ երկիր տեղափոխվելն անխուսափելի տարբերակ էր՝ հաշվի առնելով «Ալմերիայում» ստեղծված իրավիճակը: Նա չէր կարող անվճար հեռանալ: Մյուս կողմից, այդ տեղափոխությունը կարող էր խաղացողի՝ արաբական շուկայում առաջընթաց գրանցելու սկիզբ լինել, ինչով հետագայում կհետաքրքրեր Սաուդյան Արաբիայի, Քաթարի, ԱՄԷ-ի թոփ-ակումբներին: Դա նույնպես լավ ուղղություն է, առավել ևս մուսուլման խաղացողի համար»,- նշում է Աբրահամյանը:

EO7xYYSX0AYJ8B8 960x607 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Հավաքականում նորամուտի թանկ գինը․ Ինչպես «կյանքի խաղը» վերափոխեց հայ դարպասապահի կարիերան

Ալիյուն 6 խաղի մասնակցեց Առաջին դիվիզիոնի առաջնությունում, կատարեց 1 գոլային փոխանցում, ինչից հետո էլ վրա հասավ կորոնավիրուսը: Մրցաշրջանի վերսկսումից հետո անցկացրած 4 մրցավեճում ևս 1 «ասիստ» գրանցեց իր ակտիվում, առաջնությունն ավարտվեց միայն սեպտեմբերին: «Ալ Շոլան» 20 թիմի պայքարում գրավեց 12-րդ տեղը: Ակումբը գերադասեց հրաժարվել ունեցած լեգեոներներից: «Հասկացա, որ Սաուդյան Արաբիայի ֆուտբոլը չի համապատասխանում իմ տարիքի խաղացողին: Այնտեղ հանդես էին գալիս նախկինում Եվրոպայում խաղացած շատ ֆուտբոլիստներ՝ մոտ իրենց կարիերան ավարտելուն, հիմնականում՝ 30 և անց խաղացողներ: Անկեղծորեն ինձ դուր էին եկել երկիրն ու այնտեղի մարդիկ: Նրանք սիրում են ֆուտբոլն այնպես, ինչպես այստեղ՝ Եվրոպայում: Բայց եթե մնայի այնտեղ, չէի կարողանա հետագայում վերադառնալ Եվրոպա: Շատ դժվար է այնտեղ առաջադիմելը որպես ֆուտբոլիստ, հատկապես երբ տեղափոխվում ես Հին աշխարհամասից: Իմ երազանքը Եվրոպայի թոփ-ակումբներում հանդես գալն է»,- Սաուդյան Արաբիայում իր ժամանակահատվածն ամփոփում է Ալիյուն:

Վերադարձ Հայաստան, «ասիստ» հին ու նոր թիմակցից և աշխատանք Ռոբերտ Արզումանյանի հետ

Ալիյուն անցած տարվա նոյեմբերին վերադարձավ Հայաստան՝ պայմանագիր կնքելով «Ուրարտուի» հետ: Այնտեղ են նաև «Լոռիում» նախկին թիմակիցներ Մենսահը, Իվուն ու Դեսիրեն: «Տեղափոխվելուց առաջ շատ եմ զրուցել հատկապես Դեսիրեի հետ, նա շատ էր ցանկանում, որ միանայի «Ուրարտուին»: Հետաքրքիր է, որ երբ «Լոռիով» 2018 թվականին այստեղ 3-1 հաշվով հաղթեցինք այն ժամանակվա «Բանանցին», մեր կազմից հենց ես, Դեսիրեն և Իվուն մեկական գոլ խփեցինք: Որոշեցի վերադառնալ Հայաստան, քանի որ այստեղի առաջնությունն անձամբ ինձ ավելի է համապատասխանում»,- «Ուրարտուին» նախապատվություն տալն այսպես է մեկնաբանում ֆուտբոլիստը: Երևանում մենակ է ապրում, իսկ մայրաքաղաքի և Վանաձորի միջև որոշակի տարբերություն է տեսնում․ «Ինձ դուր է գալիս Վանաձորը, բայց Երևանն ավելի աշխույժ քաղաք է»:

5fc0ddef160fe 960x600 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Նա Ալեքսանդր Գրիգորյանի աշխատանքի հատվածում 6 պաշտոնական խաղի մասնակցեց՝ բացառապես մտնելով փոխարինման: Հետաքրքիր է, որ նրա օրոք հենց վերջին հանդիպմանը՝ «Վանի» դեմ մրցավեճում գրավեց մրցակցի դարպասը՝ օգտվելով հին ու նոր խաղընկերոջ՝ Դեսիրեի փոխանցումից: Իսկ ահա նոր գլխավոր մարզիչ Ռոբերտ Արզումանյանը կարծես շատ է վստահում Ալիյուին: Նկատելիորեն փոխվել է «Ուրարտուի» խաղաոճը, իսկ երիտասարդ նիգերիացին վերջին 4 պաշտոնական խաղերն անցկացրել է մեկնարկային կազմում: «Անկեղծորեն հավատում եմ այն փիլիսոփայությանը, որ Ռոբերտ Արզումանյանը ներդնում է թիմում, և նրան, ինչ այժմ կառուցում է։ Նա լավ մարզիչ է, հասցնում է ամեն ինչ շատ մանրակրկիտ ձևով բացատրել, բայց միաժամանակ լինել հստակ և ըմբռնելի»,- նշում է Ալիյուն՝ բնութագրելով երիտասարդ մասնագետին:

Դավիթ Աբրահամյանը, որը նաև «Ուրարտուի» մարզական տնօրենն է, կարծում է՝ շատ բան կախված կլինի հենց ֆուտբոլիստից․ «Միայն տաղանդը երբեք բավարար չի լինում հետագայում նշանակալի քայլ առաջ կատարելու համար: Պետք է նաև ցանկություն, քրտնաջան աշխատանք ու անսահման ինքնազարգացման պատրաստակամություն: Հուսով եմ՝ այդ ամենը կլինի, և Ալիյուն կկարողանա առաջին հերթին օգտակար լինել «Ուրարտուին»»: Թիմը ներկա պահին 5-րդ հորիզոնականում է և շարունակում է պայքարը մրցանակային տեղերի համար: Իսկ Ալիյուն դեռ չի հավաքել իր լավագույն մարզավիճակն ու պետք է ավելի մեծ ուժեր ներդնի նախկին արդյունավետությունը վերականգնելու և թիմին օգնելու համար:

170006695 3798948016824863 7031190683576062166 n 960x600 - Նիգերիայից՝ Վանաձոր, իսկ հետո Իսպանիա՝ «Ռեալի» լեգենդի թիմ․ Իսահ Ալիյուի կարիերայի «գնացքը» կրկին Հայաստանում է կանգ առել

Այսքանից հետո դժվար է հավատալը, որ կարիերայում արդեն շատ բան տեսած Իսահ Ալիյուն դեռ ընդամենը 21 տարեկան է: Նա ապացուցելու շատ բան ունի: 2018 թվականին, երբ դեռ խաղում էր «Լոռիում», Ալիյուն VNews․am-ին տված հարցազրույցում շատ հետաքրքիր պատասխան էր տվել այն հարցին, թե որն է ֆուտբոլում իր գլխավոր նպատակը․ «Ֆուտբոլն աշխարհն ավելի լավը դարձնելու յուրահատուկ ուժ ունի, և ես հուսով եմ լինել այն մարդկանց թվում, ովքեր կտարածեն այդ ուժը»: Ավելի նվիրական ցանկություն անհնար էր պատկերացնել:

Կապառոսի տղաները․ համաշխարհային ֆուտբոլի 7 բացահայտում, որ կատարել է մեր հավաքականի մարզիչը

Միացի՛ր հայկական ամենասպորտային Instagram-ին:


Սերգեյ Էրզրումյան. «Բավարարված ենք արդյունքով, քանի որ 3 առանցքային ֆուտբոլիստ բացակայում էր» (տեսանյութ)

Վարդան Բիչախչյան. «Այսօր «Արարատը» այնպիսի վիճակում է, որ մեզ համար շատ կարևոր է թե՛ առաջնությունը, թե՛ գավաթի խաղարկությունը» (տեսանյութ)

Օգնեն Չանչարևիչ․ «Հաղթելու ավելի լավ շանսեր ունեինք, քան «Արարատը» (տեսանյութ)

Կարեն Մուրադյան․ «Ամեն ինչ տալու ենք, նվիրվելու ենք, որ տիտղոս նվաճենք «Արարատի» համար» (տեսանյութ)

VBET ՀՊԼ. «Ալաշկերտը» ոչ-ոքի խաղաց «Արարատի» հետ՝ մնալով 1-ին հորիզոնականում

«Արարատ» – «Ալաշկերտ». մեկնարկային կազմեր, ուղիղ հեռարձակում

«Գանձասար-Կապանը» ցանկանում է վերադառնալ VBET Պրեմիեր լիգա. Առաջին խումբը բացառված է

Կարվախալ. «Ինչպիսի խայտառակություն»

Անդուխար Օլիվերը՝ Միլիտաոյի դրվագի մասին․ «11-մետրանոց նշանակելու համար դա բավարար չէ»

Զիդան. «Ես զայրացած եմ ու մրցավարի բացատրություններն ինձ պետք չեն»

«Ռեալը» փրկվեց պարտությունից «Սևիլիայի» դեմ խաղում (տեսանյութ)

«Ռեալի» մեկնարկային կազմը «Սևիլիայի» դեմ խաղում

Եզրափակիչի նախերգանք կամ 3 հրաշալի ներկայացումներից առաջինը․ Ինչ է պետք իմանալ VBET ՀՊԼ 23-րդ տուրից առաջ

VBET Հայաստանի Պրեմիեր լիգայի 22-րդ տուրի խորհրդանշական հավաքականը և լավագույն ֆուտբոլիստը

Ռամոսը կարող է բաց թողնել «Ռեալի»՝ այս մրցաշրջանում մնացած բոլոր խաղերը

Մեսիի հետ վերջին 15 տարում առաջին անգամ է նման բան պատահում