Առաջնության 2-րդ տուրի հանդիպումներից հետո («Նոա» – «Ալաշկերտ» խաղը հետաձգվել է) մրցաշարում եռիշխանություն հաստատվեց: 2-րդ անընդմեջ հաղթանակները տոնելով, «Արարատը», «Ուրարտուն» և «Արարատ-Արմենիան» գլխավորեցին աղյուսակը:
Տուրի ամենաուշագրավ իրադարձությունները ներկայացնում ենք 10 փաստի տեսքով:
1․ Տուրն անցավ դաշտի տերերի առավելությամբ, որոնք տոնեցին 3 հաղթանակ, կրեցին մեկ պարտություն: Հյուրընկալվելիս միակ հաղթանակը տոնեց «Արարատը»: Առաջնությունում կայացած 9 հանդիպումներից 6-ում հաղթել են դաշտի տերերը, 3-ում հաջողությունն ուղեկցել է հյուրերին:
2-րդ տուրն էլ աչքի ընկավ բարձր արդյունավետությամբ՝ 4 խաղում խփվեց 14 գնդակ (միջինը՝ 3,5 գոլ մեկ խաղում): Անցկացված 9 հանդիպումներում արդեն գրանցվել է 39 գոլ (միջինը՝ 4,3 գոլ մեկ խաղում):
2․ «Ուրարտուն» խոշոր հաշվով տոնած 2 հաղթանակներով է մեկնարկել VBET Հայաստանի Պրեմիեր լիգայում: Այս արդյունքը թիմի համար ռեկորդային է վերջին 28 տարիների ընթացքում: Միայն 1993թ. առաջնությունում է «Ուրարտուն», որ այն ժամանակ կրում էր «Բանանց» անվանումը, մեկնարկել խոշոր հաշվով տոնած 2 հաղթանակով՝ առավելության հասնելով «Մալաթիա-Կիլիկիայի» (6-0) և «Կոտայքի» (4-0) նկատմամբ: Այդ հանդիպումներում թիմի ռմբարկու Աշոտ Բարսեղյանը 5 գոլի հեղինակ էր դարձել, որից 4-ը խփել էր մեկնարկային տուրում:
Իսկ վերջին անգամ «Ուրարտուն» առաջնությունը 2 անընդմեջ հաղթանակով էր սկսել 1994թ.՝ պարտության մատնելով «Լոռիին» (1-0) և ԲՄԱ «Արայիին» (2-1): Ի դեպ, այդ մրցաշրջանում «Բանանցը» մեկնարկել էր 7 անընդմեջ հաղթանակով, ընդ որում վերջին 5 խաղերում մրցակիցներին պարտության էր մատնել խոշոր հաշիվներով: Ցավոք, ֆինանսական խնդիրների պատճառով առաջնության ավարտից հետո «Բանանցը» լուծարվեց:
3․ VBET Հայաստանի Պրեմիեր լիգայի նորեկ «Նորավանքը» ոչ միայն բացեց գոլերի հաշիվը, այլև անդրանիկ հաղթանակը տոնեց: Թիմի առաջին գոլի հեղինակ դարձավ Բենյամին Նանա Տեչիեն, որը Սիմոն Օբոնդեի հետ միասին բացեց գոլերի հաշիվը Բարձրագույն խմբում:
Մեր ընտրանին.
-
Երկու թիմ, մեկ երազանք. Հայի ու բրազիլացու առաջնորդած թիմը, որը կմրցի «Ալաշկերտի» հետ
-
Հայկական առաջին սուպերակումբը և խաղեր պայթյունների ներքո. VBET Պրեմիեր լիգան՝ 30 տարում
-
Ո՛չ Յուրչենկոն, ո՛չ էլ Գուֆրանը․ Ով է VBET ՀՊԼ 30-րդ առաջնության ամենատարեց մասնակիցը
4․ Բարձրագույն խմբում 4-րդ մրցաշրջանն անցկացնող «Արարատ-Արմենիան» 2-րդ անգամ առաջնությունը սկսեց 2 անընդմեջ հաղթանակով: Առաջին նման հաջող մեկնարկը գրանցվել էր 2019/20թթ. առաջնությունում, որում «Արարատ-Արմենիան» Վարդան Մինասյանի գլխավորությամբ հաջորդաբար հաղթել էր «Գանձասար-Կապանին» (3-1) և «Նոային» (2-1): Հիշեցնենք, որ նախորդ առաջնության մեկնարկային 2 հանդիպումներում «Արարատ-Արմենիան» ընդամենը 2 միավոր էր վաստակել՝ ոչ-ոքի խաղալով «Ալաշկերտի» (0-0) և «Գանձասար-Կապանի» (1-1) հետ: