«ԱՐԱՐԱՏ-ԱՐՄԵՆԻԱ» – «ԱՐԱՐԱՏ»
19 մայիսի, ժ.15:30, Երևան, Ֆուտբոլի ակադեմիայի մարզադաշտ
10 խաղ, «Արարատ – Արմենիան» հաղթել է 7 անգամ, «Արարատը»՝ 2, գրանցվել է 1 ոչ-ոքի, խփած և բաց թողած գոլերի հարաբերակցությունը՝ 21-8
2-րդ շրջան. 02.12.2020 «Արարատ-Արմենիա» 0-0 «Արարատ»
1-ին շրջան. 25.02.2021 «Արարատ» 1-0 «Արարատ-Արմենիա»
Գոլը՝ Դիմիտրիյե Պոբուլիչ 72՛
«Արարատ-Արմենիա»՝ 2-րդ տեղ (37 միավոր), «Արարատ»՝ 4-րդ տեղ (36 միավոր):
Հետաքրքիր 5 փաստ՝ հանդիպմանն ընդառաջ
1․ Արարատյան հերթական դերբին անչափ կարևոր է երկու թիմերի համար էլ չեմպիոնական մրցավազքում հաջողության հասնելու համար: Մրցաշարային աղյուսակում այնպիսի իրավիճակ է ստեղծվել, որ եթե «Նոան» հաղթի առաջնությունում իր ավարտական երկու խաղերում, ապա «Արարատ-Արմենիան» անկախ մնացած 3 հանդիպումների արդյունքներից, վայր կդնի չեմպիոնի լիազորությունները, իսկ արարատցիներին ոսկե մեդալներին տիրելու համար հարկ կլինի հաղթել բոլոր 4 խաղերում էլ, ինչն անչափ դժվար կլինի: Սակայն ամեն դեպքում, երկու թիմերն էլ նախ պետք է ձգտեն հաջողության հասնել արարատյան դերբիում և հուսալ, որ «Նոան» «կսայթաքի»:
2․ «Արարատ-Արմենիան» նախորդ խաղում «Ուրարտուին» հաղթելու շնորհիվ դեռ շարունակում է պայքարը չեմպիոնի տիտղոսը նվաճելու համար: Սակայն, եթե պարտվի «Արարատին», իսկ «Նոան» էլ հաղթի «Ուրարտուին», ապա ժամկետից շուտ վայր կդնի չեմպիոնի լիազորությունները: «Ուրարտուի» նկատմամբ տոնած հաղթանակն ընդամենը 2-րդն էր չեմպիոնի համար Անատոլի Բայդաչնու գլխավորությամբ անցկացրած առաջնության 6 հանդիպումներում, որոնցում թիմն ընդամենը 9 միավոր է վաստակել:
3․ «Արարատն» այս հանդիպմանը կներկայանա Հայաստանի վեցակի գավաթակրի կարգավիճակով: Թիմի առջև դրված առաջին խնդիրը մարզչական կազմն ու ֆուտբոլիստները գերազանց կատարեցին: Այժմ արարատցիների ողջ ուշադրությունը կենտրոնացված է չեմպիոնի տիտղոսի նվաճմանը: «Արարատին» բավական խիտ գրաֆիկով 4 դժվարին մրցախաղ է սպասում, որոնցում նույնիսկ երկու միավորի կորուստը կարող է զրկել նրանց ոսկե մեդալներից: Առաջնության նախորդ 4 խաղերն այնքան էլ հաջող չէին «Արարատի» համար, որն ընդամենը 5 միավոր վաստակեց՝ սկզբունքային մրցավեճում զիջելով «Նոային», ինչը կարող է ի վերջո ճակատագրական լինել չեմպիոնական մրցավազքում:
4․ Թեև «Արարատ-Արմենիան» մեծ առավելության է հասել «Արարատի» հետ դիմակայությունում, սակայն ընթացիկ մրցաշրջանում ուժերի փոխհարաբերությունը փոխվել է: Առաջնության նախորդ երկու խաղերում չեմպիոնն ընդամենը մեկ միավոր է վաստակել՝ այդպես էլ չգտնելով «Արարատի» դարպասի բանալին: Գավաթի մրցաշարում էլ «Արարատը» կիսաեզրափակիչում առավելության հասավ «Արարատ-Արմենիայի» նկատմամբ (2-0, 1-2):
Իսկ մինչև ընթացիկ առաջնության մեկնարկը միակ հաղթանակն «Արարատ-Արմենիայի» նկատմամբ «Արարատը» տոնել էր Բարձրագույն խմբում, մրցակիցների առաջին ծանոթության ժամանակ՝ 2018թ. օգոստոսի 11-ին կայացած խաղում առավելության հասնելով 2-1 հաշվով: Հետաքրքիր է, որ արարատցիներին հաղթանակ էր պարգևել «Արարատի» ներկայիս ավագ Հրայր Մկոյանի ինքնագոլը, որն այդ խաղում հանդես էր գալիս «Արարատ-Արմենիայի» կազմում:
5․ Յուսուֆ Օտուբանջոն «Ուրարտուի» հետ խաղում դուբլ ձևակերպելով, ոչ միայն ընդհատեց 359 րոպե տևած թիմի գոլային երաշտը, այլև դարձավ ընթացիկ առաջնությունում 10 գոլ խփած առաջին ֆուտբոլիստը: Այդ ցուցանիշով նա միանձնյա գլխավորում է առաջնության լավագույն ռմբարկուների ցանկը: Առայժմ Օտուբանջոյի արդյունքն ամենացածրն է Հայաստանի առաջնությունների լավագույն ռմբարկուների ցանկում: Նշենք, որ վատագույն արդյունքը գրանցվել է 2016/17 (Միհրան Մանասյան, Արտակ Եդիգարյան) և 2017/18թթ. (Արտակ Եդիգարյան) առաջնություններում, որոնցում լավագույն ռմբարկուների հաշվին 13-ական գոլ էր գրանցվել:
Սարգիս Շահինյանն էլ «Ուրարտուի» հետ խաղում հոբելյան նշեց՝ մասնակցելով Բարձրագույն խմբում 150-րդ հանդիպմանը:
Դիմակայության լավագույն ռմբարկուները՝
«Արարատ-Արմենիա»՝ Մաիլսոն Լիմա, Յուսուֆ Օտուբանջո՝ 4-ական գոլ:
«Արարատ»՝ Արտյոմ Սիմոնյան՝ 2 գոլ: