Մեր «5 ֆիլմ+5 գիրք» շարքում ճանաչված մարդիկ ներկայացնում են իրենց սիրված ֆիլմերի և գրքերի հնգյակները: Այս ֆիլմերի և գրքերի շնորհիվ դուք նախ՝ ավելի լավ կճանաչեք հայտնիներին, կհասկանաք նրանց ճաշակն ու մտածողությունը, և հետո՝ կունենաք 5 ֆիլմերի և 5 գրքերի ցանկ, որոնք կարող եք դիտել և կարդալ՝ հարստացնելով ձեր սեփական ֆիլմա-գրքացանկերն ու ազատ ժամանակը:
Այս շաբաթ խնդրել ենք կինոռեժիսոր Արեն Մալաքյանին՝ մեզ և ձեզ հետ կիսվել սիրելի ֆիլմերի և գրքերի հնգյակներով:
Հերման Հեսսե, «Սիդհարթա»
Հերման Հեսսեի այլաբանական վեպ-առակը, որն առաջին անգամ հրատարակվել է S. Fischer Verlag հրատարակչության կողմից 1922 թվականին։ Վեպը պատմում է Գաութամա Բուդդայի ժամանակակից բրահման Սիդհարթայի հոգևոր ինքնաճանաչման ճանապարհի մասին։ Այն Հեսսեի 9-րդ վեպն է, գրված է գերմաներեն, պարզ, քնարական ոճով։ ԱՄՆ-ում տպագրվել է 1951 թվականին և ազդեցիկ դարձել 1960-ականներին։ Հեսսեն վեպը նվիրել է Ռոմեն Ռոլանին և Վիլհելմ Գանդերտին։
Ֆրանց Կաֆկա, «Դղյակ»
Անավարտ վեպ՝ գրված Ֆրանց Կաֆկայի կողմից։ Տպագրվել է Մյունխենում հեղինակի մահից հետո։ Կաֆկան սկսել է աշխատել վեպի վրա 1922 թվականի հունվարի 22-ին, երբ այցելել էր Շմինդլերուվ-Մլին առողջարանային քաղաք։ Վեպի առաջին գլուխները սկզբնական տարբերակում գրված են եղել առաջին դեմքով, հետո միայն վերափոխվել են հեղինակի անունից գրված վեպի։ Վեպի հերոսը, ում հեղինակն անվանում է հապավումով՝ Կ., գալիս է Գյուղ, որը ղեկավարվում է Դղյակի կողմից։ Դղյակի կառավարչի տղային, ով փորձում է Կ.-ին հյուրանոցից դուրս հանել, նա ասում է, որ իրեն՝ որպես հողաչափ, վարձել են իշխանությունները, և որ շուտով գալու են իր օգնականները։ Սակայն պարզվում է, որ Դղյակ մտնել, առանց հատուկ թույլտվության, որը Կ.-ն չունի, հնարավոր չէ։ Շուտով գալիս են Արթուրն ու Երեմիասը, ովքեր հայտարարում են, թե Կ.-ի օգնականներն են, բայց Կ.-ն նրանցից ոչ մեկին չի ճանաչում…
Իտալո Կալվինո, «Մեր Նախնիները»
Իտալո Կալվինո, եղել է իտալացի հայտնի գեղարվեստական գրող և 20-րդ դարի հետմոդեռն գրելու առաջատար դեմքերից մեկը: 1952 թվականին լույս են տեսնում Կալվինոյի «Երկատված վիկոնտը», 1957-ին՝ «Ծառաբնակ բարոնը», իսկ 1959 թվականին «Գոյություն չունեցող ասպետը» վեպերը, որոնք կազմում են «Մեր նախնիները» (I nostri antenati) եռագրությունը։ Այս վեպերում հեղինակն ներկայացնում է արդի մարդու ալեգորիկ պատկերը։
Հրաչյա Սարիբեկյան, «Երկվորյակների արևը»
Ջեբրան Խալիլ, «Խենթը»
«Խենթը» XX դարի լիբանանա-ամերիկյան փիլիսոփա, նկարիչ, պոետ և գրող Ջեբրան Խալիլ Ջեբրանի առաջին անգլերեն ստեղծագործությունն է։ Գիրքը բաղկացած է կարճ էսսեներից և բանաստեղծություններից մարդու հավատքի, ձգտումների և ունայնության մասին։