Դերասան Բաբկեն Չոբանյանին գիտեն բոլորը, իսկ եթե դեռ կան մարդիկ, որ չգիտեն նրան որպես դերասան, ապա հաստատ լսած կլինեն նրա ձայնը: Նրա հնչյունավորած ֆիլմերը, հաղորդումները տարիներ շարունակ մեր հեռուստաեթերների անբաժանելի մասն են:
Vivaro News Culture-ը զրուցել է դերասան Բաբկեն Չոբանյանի հետ և փորձել ճշտել՝ որոնք են նրա ամենասիրելի ֆիլմերն ու գրքերը:
Ահա բազմաթիվ ֆիլմեր հնչյունավորած դերասանի ամենասիրելի ֆիլմերի 5-յակը:
1. Ծովը հոգում / Море внутри/ Mar adentro. 2004
ռեժ.՝ Ալեխանդրո Ամենաբար
դերերում՝ Խավիեր Բարդեմ, Բալեն Ռուեդա ևն
Իրական դեպքերի վրա հիմնված պատմություն Ռամոն Սամպեդրո անունով մի իսպանացու կյանքի վերջին 2 տարիների մասին: Նա պայքարում էր էվթանազիայի օրինականացման համար: Ռամոնը կաթվածահար վիճակում էր երկար ժամանակ, հոգնել էր իր կյանքից, սակայն սեփական կամքով կյանքից հեռանալն արգելված էր: Ի՞նչ անել, շարունակե՞լ պայքարը, ապրե՞լ, թե՞ օգնություն խնդրել մարդկանցից:
Ֆիլմը ողջ աշխարհում ստացել է մոտ 60 կինոմրցանակ:
2. Մենք ենք, մեր սարերը. 1969
ռեժ՝ Հենրիկ Մալյան
դերերում՝ Մհեր Մկրտչյան, Սոս Սարգսյան, Խորեն Աբրահամյան, Ազատ Շերենց ևն
«Մենք ենք, մեր սարերը» Հրանտ Մաթևոսյանի համանուն ստեղծագործության հիման վրա նկարահանած գեղարվեստական կինոնկար է։ Այս ֆիլմը բոլորիս սիրելիներից է, այն յուրաքանչյուրս տեսել է բազմաթիվ անգամներ, անգիր է արել հերոսների երկխոսությունները, ֆիլմից առանձին արտահայտություններ թևավոր խոսքի են վերածվել:
Ֆիլմ մարդու և աշխարհի հարաբերությունների մասին, ֆիլմ դարերով ավանդված հարաբերության տեսակների և աշխարհի արագ փոփոխությունների մասին:
3. Մեկ անգամ Ամերիկայում / Однаждый в Америке / Once Upon a Time in America. 1983
ռեժ.՝ Սերջիո Լեոնե
դերերում՝ Ռոբերտ Դե Նիրո, Ջեյմս Վուդս, Էլիզաբեթ Մաքգովերն ևն
Լեգենդար ֆիլմ, որը պատմում է 1920-30-ականներին նյույորքյան հրեական թաղամասում մեծացած մի խումբ հանցագործ-հեղինակությունների մասին:
Նյու Յորքում 20-ականները ջազի և մեծ երազանքների դարաշրջան էր: Հենց այդ շրջանում քաղաքի ետնախորշերում հանդիպում են մի քանի տղա: Բոլոր մրցակիցներին ճանապարհից հեռացնելով, հարստանալու հաստատ որոշմամբ, դավաճաններին անխնա պատժելով՝ նրանք կարողանում դառնալ հեղինակություն հանցագործների մեջ և հարսատանալ: Տղաները միմյանց երդում էին տվել. միշտ պաշտպանել իրար և ընկերությունը վեր դասել ամեն ինչից: Բայց այն, ինչ մեկ անգամ տեղի ունեցավ Ամերիկայում, հավերժ փոխեց նրանց երդումներն ու ճակատագրերը…
4. Արթնացում//Пробуждение//Awakenings, 1990
ռեժ.՝ Փեննի Մարշալ
դերերում՝ Ռոբերտ Դե Նիրո, Ռոբին Ուիլյամս
Ֆիլմի հիմքում է Օլիվեր Սաքսի 1973 թ. հիշողությունների գիրքը: Սաքսը 1969-1970 թ.թ. իր փորձարարությունների մասին է գրել այդ գրքում:
Հազվադեպ և տարօրինակ հիվանդություններ: Բժիշկ Մալքոլմ Սեյերը փորձ է անում. նա դեղահաբեր է տալիս իր հիվանդներին՝ հույս ունենալով, որ դրանք օգուտ կտան: Առաջին հիվանդը Լեոնարդն էր, ում վրա դեղերը լավ են ազդում և նա սկսում է ավելի առույգ և ուրախ կյանք վարել: Լեոնարդի իրականությունը փոխվում է, և ոգևորվելով տղամարդու հաջողությամբ՝ բժիշկը նույն հաբերով փորձում է բուժել նաև այլոց:
5. Կա-Պեքս մոլորակը / Планета Ка-Пэкс / K-PAX. 2001
Ռեժ.՝ Յեն Սոֆթլի
դերերում՝ Քևին Սփեյսի, Ջեֆ Բրիդջես ևն
Հոգեբուժարան են բերում մի տարօրինակ մարդու՝ սև արևային ակնոցով: Նա պնդում է, որ իր հայրենիքը հեռավոր Կա-Պեքս մոլորակն է: Եվ որքան էլ փորձառու հոգեբույժը ջանում է բացահայտել այդ տարօրինակ մարդու հիվանդությունը, մեկ է, նրա մոտ ոչինչ չի ստացվում: Իսկ գուցե ակնոցով տղամարդն իրո՞ք այլմոլորակային է…
Իսկ Բաբկեն Չոբանյանի ամենասիրելի գրքերը հետևյալն են.