1. Թայիս Աթենուհին/ Таис Афинская
Հեղ.՝ Իվան Եֆրեմով
Եֆրեմովի՝ 1972 թ․վեպը պատմում է Ալեքսանդր Մակեդոնացու արշավանքների մասնակից Թայիս Աթենուհու մասին։ Կարելի է ասել, որ վեպը՝ կնոջը, նրա գեղեցկությանը, խելքին և իմաստությանը նվիրված հիմն է։ Թայիսն այս բոլոր հատկանիշների կրողն է։ Նրա կյանքը լի է հետաքրքիր արկածներով, որոնք հաղթահարելիս նա ավելի ու ավելի հիասքանչ է դառնում։
Վեպում նկարագրվում են 337-308 թթ. Հին Հունաստանում կատարվող դեպքերը։
2. Օդլյան կամ ազատության օդը/Одлян, или Воздух свободы
հեղ․՝ Լեոնիդ Գաբիշև
1989 թ․ գրված այս վեպը մի գյուղացի դեռահասի մանկության և ճակատագրի մասին է, որը հայտնվում է դաստիարակչական գաղութում՝ Օդլյանում։ Այստեղ գլխավոր հերոսին դաժան փորձություններ են սպասվում, որոնք նա պետք է կարողանա հաղթահարել։ Դժվար է պատկերացնել, բայց հերոսը հենց այստեղ է գտնում ազատությունը և հասկանում դրա իմաստը։
Տես նաև՝5 ֆիլմ+5 գիրք. Տաթևիկ Մելքոնյան
3. Վարպետը և Մարգարիտան/Мастер и Маргарита
հեղ.՝ Միխայիլ Բուլգակով
թարգմանիչ՝ Արմեն Հովհաննիսյան
Համաշխարհային գրականության լավագույն ստեղծագործություններից մեկը, խորհրդավոր, միստիկ, հզոր, աներևակայելի հորինվածքով և հանճարեղ կառուցվածքով: Միխայիլ Բուլգակովի այս վեպը գրվել է 1929-1940 թթ. և գրողի կենդանության օրոք չի հրատարակվել:
Վեպում զարգանում են 2 սյուժետային գիծ. մեկը պատմում է 20-րդ դարի առաջին տասնամյակների Մոսկվայի, մյուսը՝ Քրիստոսի հայտնության 30-ականների երուսաղեմյան դեպքերի մասին: Վեպի երկու սյուժետային գծերը որքան էլ կապ չունեն իրար հետ, նույնքան էլ կապված են՝ կազմելով մեկ ամբողջականություն, մեկ ասելիք: Պարտադիր ընթերցելու և վերընթերցելու վեպ:
4. Սառույցի և կրակի երգը/A Song of Ice and Fire
հեղ․՝ Ջորջ Մարտին
Սառույցի և կրակի երգը ֆենթըզի ժանրի վեպերի շարք է, որը ներառում է Գահերի խաղը, Թագավորների ճակատամարտը, Պար վիշապների հետ, Թրերի մրրիկ, Ձմռան քամիներ․․․ մասերը։
Այս գրքաշարը հիմք է դարձել հայտնի «Գահերը խաղը» սերիալի համար: Այն սերիալի պես լի է զարհուրելի, վախեցնող, ֆանտաստիկ ու պատերազմական դրվագներով:
Ձմեռը մոտ չէ, ձմեռն արդեն այստեղ է, ուրեմն սկսեք կարդալ այս գրքաշարը հենց հիմա:
5. Տունը որում․․․/ Дом в котором….
հեղ․՝ Մարիամ Պետրոսյան
2009 թ․ լույս տեսած գիրքը պատմում է սովորական դարձած նորակառույց շենքերի մոտ գտնվող հաշմանդամ երեխաների գիշերօթիկ դպրոցի մասին, որտեղ ապրում են Սֆինքսը, Կույրը, Լորդը, Ծխամոլը, Մակեդոնացին, Սևը և այլ երեխաներ: Այդ մոխրագույն, հին տանը, որտեղ շատ գաղտնիքներ կան, ամեն մեկն իր մականունն ունի։ Երեխաների համար այս տունն իրենց առանձին տիեզերքն է․․․
