1. Կնոջ բույրը/Scent of a Woman/1992/
ռեժ.՝ Մարտին Բրեստ
դերերում՝ Ալ Պաչինո, Քրիս Օ’Դոննել, Ջեյմս Ռեբհորն
Ավարտական դասարանի աշակերտ Չարլի Սիմսը տոնական օրերին աշխատանքի է անցնում որպես խնամակալ. նա պիտի խնամեր հանգստի մեկնող զույգի կույր ազգականին։ Վերջինս պաշտոնաթող փոխգնդապետ է, որ կուրացել է դժբախտ պատահարի հետևանքով։ Նա կոպտորեն է դիմավորում Չարլիին։ Երիտասարդը ցանկանում է հրաժարվել աշխատանքից, բայց վերջիվերջո համաձայնում է մնալ…
2. Ստալկեր/Сталкер, 1979
ռեժիսոր՝ Անդրեյ Տարկովսկի
Դերերում՝Ալիսա Ֆրեյնդլիխ, Ալեքսանդր Կայդանովսկի ևն
Արկադի և Բորիս Ստրուգացկիների 1972 թ. ստեղծագործությունը Տարկովսկին էկրանավորել է 1979 թ.:
«Ոսկե արմավենու» դափնեկիր այս ֆիլմը պատմում է Զոնա անունով մի տարածքի մասին, որտեղ մարդկային բոլոր նվիրական երազանքները կյանքի են կոչվում: Իրականություն, թե՞ ուղղակի հորինվածք՝ ոչ ոք չի կարող ասել:
Գրողը և պրոֆեսորը Ստալկերի հետ միասին ուղևորվում են Զոնա. նրանք հույս ունեն, որ կգտնեն իրենց բոլոր հարցերի պատասխանները:
3. Կնքահայրը
ռեժիսոր՝ Ֆրենսիս Ֆորդ Կոպոլա
դերերում՝ Մառլոն Բրանդո, Ալ Պաչինո, Դայան Քիթոն, Ռոբերտ Դե Նիրո
1972 թ. էկրաններ է բարձրանում Ֆրենսիս Ֆորդ Կոպոլայի «Կնքահայրը» ֆիլմը: Ֆիլմը նկարահանվել է Մարիո Պյուզոյի «Կնքահայրը//The Godfather» 1969 թ. գրքի հիման վրա: Գիրքը տարածվեց աշխարհում 10 000 000 օրինակով և համարվում է 20-րդ դարի ամենաշատ վաճառված գրքերից մեկը:
«Կնքահայրը» արժանացել է Օսկարի՝ «Լավագույն ֆիլմ», «Լավագույն ադապտացված սցենար» և «Լավագույն դերասան» (Մառլոն Բրանդո) անվանակարգերում:
IMDb կայքի տվյալներով, ֆիլմը զբաղեցնում է երկրորդ տեղը, իսկ երրորդ տեղում է «Կնքահայրը 2» 1974 թ. ֆիլմը:
Կրիմինալ սագան պատմում է 40-50-ականների Կառլեոնե մաֆիոզ ընտանիքի մասին: Վիտո Կառլեոնեն՝ ընտանիքի հայրը, ամուսնացնում է իր աղջկան և միաժամանակ դիմավորում է որդուն, ով Երկրորդ համաշխարհային պատերազմից տուն է վերադառնում: Որդին՝ Մայքլը, ցանկություն է հայտնում զբաղվել հոր գործերով, բայց նա չգիտի այդ գործերի ամբողջ գորշության ու դաժանության մասին: Ժամանակները փոխվել են. այստեղ այլևս չեն գործում հին օրենքներն ու խաղի կանոնները:
4. Մեծ քաղաքի լույսերը
ռեժիսոր՝ Չարլի Չապլին
դերերում՝ Հարրի Մայերս, Չարլի Չապլին, Հենրի Բերգման ևն
«Մեծ քաղաքի լույսերը» City Lights: A Comedy Romance in Pantomime), համր լիամետրաժ ֆիլմ է՝ նկարահանված 1931 թվականին։ Առաջին անգամ ցուցադրվել է՝ 1931 թվականի հունվարի 30–ին, ԱՄՆ–ում։ Չառլի Չապլինի ամենահայտնի ֆիլմերից մեկն է։
Թափառաշրջիկը դեգերում է մեծ ու վտանգավոր քաղաքով, փնտրելով նոր արկածներ ու զգացողություններ։ Նա հանդիպում է մի ծաղիկներ վաճառող աղջկա, որը ինչպես հետագայում պարզվում է՝ կույր է։ Վերջինս պատահականորեն, թափառաշրջիկին մեծահարուստի տեղ է դնում, իսկ նա էլ՝ սիրահարվում աղջկան…
5. Տաք երկիր, ցուրտ ձմեռ
Պրոդյուսեր և բեմադրող ռեժիսոր՝ Դավիթ Սաֆարյան
Դերերում՝ Յանա Դրուզ, Աշոտ Ադամյան, Հեղինե Հովհաննիսյան, Կարեն Ջանիբեկյան, Վիգեն Ստեփանյան, Հարություն Մովսիսյան, Հրաչյա Հարությունյան
«Տաք Երկիր,Ցուրտ Ձմեռ» ֆիլմը պատմություն է տղամարդու և կնոջ մասին, որոնք ապրում են դժվարին և հակասական պայմաններում: Դրանք մեզ քաջ ծանոթ նախկին դարի 90-ականների տարիներն են: Ֆիլմում առկա են նաև հերոսների 60-ականների, 70-ականների, 80-ականների հուշերը:
Մեջբերում ֆիլմի երկխոսություններից.
– …ոնց էլ դիմանում է այս ամենին ժողովուրդը և, ոնց էլ դիմացել է: Դարեր շարունակ. պատերազմներ, արհավիրքներ, ամեն տեսակի զավթիչներ: Դեռ հանաքներ էլ անում է՝ հենց իր իսկ մասին…
– Ե՞րբ էլ էդպես հայերեն խոսել սովորեցիր:
– Ցուրտ ձմեռներին:
– Գիտես, երբ ապրելու պայմաններն անտանելի են դառնում, մարդը շատ արագ կորցնում է իր դեմքը: Մենք տարիներ ապրեցին անմարդկային պայմաններում ու, Փառք Աստծո, մարդ մնացինք:
6. Ստվերները դրախտում
ռեժիսոր՝ Գոռ Վարդանյան
Կինոռեժիսոր ու պրոդյուսեր Գոռ Վարդանյանը «Ստվերները դրախտում» ֆիլմով նպատակ ունի դուրս գալ միջազգային ասպարեզ:
«Ֆիլմը մարդկային պատմության մասին է, որը կարող պատահել ցանկացածի հետ: Մեր նախորդ ֆիլների նման չէ, ավելի շատ դրամա է: Սա նոր բան էր ինձ համար, թե որպես դերասան և թե որպես ռեժիսոր: Ֆիլմից հետո, կարծում եմ, կփոխվի մարդկանց կարծիքը հայ ընտանիքների մասին: ֆիլմով ուզում եմ ասել, որ սիրեն հերոսին, բայց չնմանվեն նրան», – պատմել է ռեժիսորը՝ լրագրողների հետ հանդիպման ժամանակ:
