Պրեմիեր լիգան Boxing Day-ի խառնաշփոթից ու գավաթային խաղերից հետո նորից վերադառնում է ամենշաբաթյա հունի: Իհարկե, դա մեզ ավելի շատ ժամանակ է տալիս լուրջ վերլուծելու ու ավելի հանգամանորեն ընտրելու մեր Fantasy թիմը: Ահա և մեր 5 առաջարկները.
5. Դուայթ Մաքնեյլ – 5000 $
Խաղը՝ «Բարնլի» – «Ֆուլհեմ»
Դեռ հին տարուց եկած սովորության համաձայն անպայման վերցնում ենք ֆուտբոլիստ «Ֆուլհեմի» մրցակից թիմից: Թեև այս թիմը վերջին շրջանում կարողացել է հեռանալ վերջին հորիզոնականից, բայց շարունակում է մնալ ամենաշատ գնդակ բաց թողած թիմը՝ 47: Ու եթե դուք մինչ այս, հնարավոր է, կասկածներ ունենայիք «Բարնլիից» ֆուտբոլիստ ընտրելու հարցում, ապա 19-ամյա ձախ վինգեր Դուայթ Մաքնեյլը կփարատի դրանք: «Վեստ Հեմի» հետ խաղում նա դարձել է գոլի, իսկ «Հադերսֆիլդի» հետ խաղում առանձնացել է գոլային փոխանցմամբ, թեև դա իր միայն 4-րդ խաղն էր Պրեմիեր լիգայի ընթացիկ մրցաշրջանում: Պատահական չէ, որ հենց այդ խաղերում էլ «Բարնլին» 2 անընդմեջ հաղթանակ տարավ 3-խաղ շարունակ պարտություն կրելուց հետո: Ընդամենը 5000$, այս գնով նրան արժե ունենալ եթե ոչ հիմնական կազմի, ապա գոնե պահեստայինների համար:
4. Ռիկարդո Պերեյրա – 5600 $
Խաղը՝ «Լեսթեր» – «Սաութհեմփթոն»
Դժվար խաղեր «Սիթիի» ու «Չելսիի» դեմ, առայժմ պարզ չէ՝ արդյո՞ք «Սաութհեմփթոնը» կարողացել է ուշքի գալ այս ամենից, թե ոչ: Մինչդեռ նույն օրերին «Լեսթերը» հաղթում էր նույն «Մանչեսթեր Սիթիին» ու «Չելսիին», ընդ որում՝ նաև այս մարդու ջանքերով: Հենց նա մխրճեց հաղթական գոլը «Սիթիի» հետ խաղում` իր ցուցանիշն այս մրցաշրջանում հասցնելով 2 գոլի և նույնքան գոլային փոխանցման: Չմոռանանք, որ նա ձախ պաշտպան է, ու հարձակման գծում առանձնապես չտպավորող «Սաութհեմփթոնի» հետ խաղում կարող է հավաքել միավորներ նաև դարպասն անառիկ պահելու դեպքում: Դրա հետ կապված վիճակագրությունը ևս հիմնավոր է թվում. պորտուգալացու մասնակցությամբ 18 խաղից 7-ը «Լեսթերն» ավարտել է առանց գնդակ բաց թողնելու, իսկ «Սաութհեմփթոնն» էլ վերջին 3 խաղում ընդամենը 2 գոլ է խփել: