9 գիրք միանգամից [մեզ լավ նվեր Անտարեսից]
1. Համբարձումյան Համբարձում. Կորեական դելիկատես
Պատմվածքներ
Անտարես հրատարակչություն
«Կորեական դելիկատես» ժողովածուն Համբարձում Համբարձումյանի առաջին գիրքն է: Նրանում ընդգրկված պատմվածքները թեպետ գրվել են տարբեր ժամանակներում, բայց ամբողջացնում են Համբարձումի գրողական ձեռագրի բոլոր յուրահատկությունները՝ պատումի անսեթևեթ ու անբռնա զբոսիկ ոճ, «մանկական զվարթախոհությամբ» լեցուն սյուժեներ, չափազանց կոլորիտային, տպավորող ու տեքստից տեքստ «թափառող» հերոսներ:
#mustread_list [2018-ին հայերենով լույս տեսած 5 գիրք]
2. Քրիստիան Բատիկեան. Սուփըր հերոսները կը մեռնին ամրան
պատմվածքներ [վերահրատարակություն]
Զանգակ հրատարակչություն
Մանկության իրականությունը կենդանացնող պատմություն, որտեղ մարդկանց հետ հավասար իրականությունն ստեղծող կենդանի մասնակիցներն են նաև կոմիքսների հերոսները: Քրիստիան Բատիկեանի պատմվածքների հերոսները պատանիներն են, որոնց «մեծերի իրականություն» անցնելու առաջին քայլն սկսվում է իրենց իդեալների՝ սուփըր հերոսների հետ բախումից: Գրքում հետաքրքիր կերպով ցույց են տրված ժամանակակից արևմտյան մշակույթի ազդեցությունը պատանու ձևավորման վրա, ինչպես նաև գաղութում մեծացող երեխայի մանկության և ինքնության խնդիրները: