Աշխարհի հասուն բնակիչների մեծ մասը ճանաչում է Վան Գոգի «Աստղազարդ գիշերը», Կլիմտի «Համբույրը», դա Վինչիի «Խորհրդավոր ընթրիքը», Էդվարդ Մունկի «Ճիչը» և այլ հայտնի կտավները: Սակայն արվեստի այս ճյուղը, ինչպես և մյուս բոլոր ճյուղերը, անսահման է, և բոլոր նկարները, իհարկե, ճանաչել դժվար է: Ահա ևս 5 հիանալի նկար տարբեր տաղանդավոր նկարիչների կողմից, որոնք, կարծում ենք, պետք է ճանաչել:
Վինսենթ վան Գոգ. «Նոր Ամստերդամի բացվող կամուրջը»
Վան Գոգի այս գործը ստեղծվել է 1883թ.-ի նոյեմբերին՝ Նիդեռլանդներում: Իր եղբորը գրած նամակում նկարիչը գրել է. «Այստեղ մի փոքր պատշգամբ ունեմ, որտեղից տեսնում եմ մի հետաքրքիր բացվող կամուրջ»: Նամակում նա գծագրել է կամուրջը, որը հետո դարձել է այս աշխատանքի հիմքը: «Նոր Ամստերդամի բացվող կամուրջը» նկարչի՝ ջրաներկով նկարած 148 պատկերներից մեկն է: Ջրաներկով աշխատելու մասին Վան Գոգն ասել է. «Ի՜նչ զարմանալի բան է ջրաներկը, որ կարողանում է արտահայտել միջավայրն ու տարածությունն այնպես, որ թվում է կերպարը շրջապատված է օդով ու կարողանում է շնչել»:
Քլոդ Մոնե. «Կանայք այգում»
Կտավը Մոնեն սկսել է նկարել 1866թ.-ին, երբ 26 տարեկան էր: Մեկ հստակ դիրքից պատկերի վերին մասը ճշգրիտ նկարելու համար Մոնեն ստիպված է եղել դրա ներքևի մասն իր փորած խորը փոսի մեջ իջեցնել: Նկարում պատկերված է այն այգին, որը վարձել էր, իսկ կերպարների համար բնորդուհի է եղել հետագայում իր առաջին կինը դարձած Կամիլան: Նկարն առաջինը գնել է նկարիչ Ֆրեդերիկ Բազիլը՝ օգնելու համար Մոնեին, որն այդ ժամանակ ոչ մի լումա չուներ:
Ջոն Էվերեթ Միլլե. «Օֆելյա»
Բրիտանացի նկարիչ Միլլեն այս կտավն ավարտին է հասցրել 1851-1852թթ.-ին: Նկարում պատկերված է Ուիլիամ Շեքսպիրի գրչին պատկանող «Համլետ» պիեսի հերոսուհի Օֆելյան: Միլլեն նկարել է հերոսուհուն գետում երգելիս՝ նախքան խորտակվելը: Սկզբում այս նկարին շատ ուշադրություն չի հատկացվել, բայց հիմա բազմաթիվ մարդիկ պարզապես հիանում են այս գեղեցկությամբ:
Ջոն Սինգեր Սարջենթ. «Մեխակ, շուշան, շուշան, վարդ»
Հայտնի նաև «Չինական լապտերներ» անվանումով այս կտավը նկարել է ամերիկացի նկարիչ Ջոն Սինգեր Սարջենթը 1885-1886թթ.-ին: Բնորդուհիներն են Դորոթի և Պոլլի Բարնարդները՝ նկարազարդող Ֆրեդերիկ Բարնարդի դուստրերը: Սարջենթն ընտրել է հենց այս երեխաներին իրենց գեղեցիկ շեկ վարսերի համար: Նկարչի մոտ կտավը ստեղծելու գաղափարը ծնվել է Թեմզայով Բերքշիրի շրջակայքում ճանապարհորդելու ժամանակ, երբ տեսել է չինական լապտերիկներ, որոնք կախված էին ծառերի և շուշանների միջև: Նա սիրահարվել էր այդ տեսարանին ու ցանկացել անպայման նկարել այն:
Գյուստավ Կուրբե. «Հուսահատ մարդը»
Կուրբեն հոգնել էր ձևականություններից ու չափազանցություններից, և հենց սա հրեց նրան դեպի «իրականության գիրկը»: Նա չէր նկարում տպավորիչ գույներով, հետաքրքիր դիրքերով ու ուռճացված գեղեցկությամբ. նա պարզապես նկարում էր իրականությունն այնպիսին, ինչպիսին այն կար: Հենց Կուրբեն էր ղեկավարում 19-րդ դարի ֆրանսիական նկարչության ռեալիստական շարժումը, բայց նախքան դա նա մի քանի ռոմանտիկ ոճի ինքնադիմանկարներ է արել, որոնցից մեկն էլ հենց սա է՝ «Հուսահատ մարդը»: Այն ժամանակ դիմանկարները սովորաբար պետք է արտահայտեին բնորդի հոգեբանական ու էմոցիոնալ վիճակը, և հենց այս տպավորությունն էլ ստանում ենք Գյուստավ Կուրբեի ինքնադիմանկարից՝ նկարիչը հուսահատ էր: