Միջազգային հերթական դադարից հետո 9-րդ տուրի 5 հանդիպումներով կրկին վերսկսվում է VBET ՀՊԼ-ի հոբելյանական՝ 30-րդ առաջնությունը:
Ձեր ուշադրությանն ենք ներկայացնում կայանալիք 5 հանդիպումներին վերաբերող ամենահետաքրքիր ու ամենաուշագրավ փաստերը:
«ՆՈԱ» – «ՍԵՎԱՆ»
15 հոկտեմբերի, ժ.16:00, Երևան, Ֆուտբոլի ակադեմիայի մարզադաշտ
VBET ՀՊԼ-ում մրցակիցներն առաջին անգամ են հանդիպելու
«Նոա»՝ 5-րդ տեղ (10 միավոր), «Սևան»՝ 3-րդ տեղ (15 միավոր):
Հետաքրքիր 5 փաստ՝ հանդիպմանն ընդառաջ
- Անհաջող մեկնարկից հետո «Նոան» նախորդ 3 տուրերում զգալիորեն բարելավեց մրցաշարային վիճակը՝ վաստակելով 7 միավոր: Նախ «Նոան» ոչ-ոքի (1-1) խաղաց «Նորավանքի» հետ, ապա հաղթեց «Վանին» (2-1) և «Ուրարտուին» (1-0):
- «Սևանը» Պամբոս Քրիստոդուլուի գլխավորությամբ առաջնությունում առայժմ ոչ միայն չի պարտվել, այլև անցկացրած 6 հանդիպումներում դարպասն անառիկ է պահել: Այդ հանդիպումներում «Սևանը» 12 միավոր է վաստակել՝ տոնելով 3 հաղթանակ, նույնքան խաղ ավարտելով գոլազուրկ ոչ-ոքի:
«Սևանն» առայժմ միակ թիմն է, որին հաջողվել է միավոր վաստակել «Արարատ-Արմենիայի» հետ մրցավեճում՝ խաղն ավարտելով գոլազուրկ ոչ-ոքի, որով ընդհատեց մրցակցի 7 անընդմեջ հաղթանակների ռեկորդային շարքը:
- «Նոայի» կազմում բոլորից արդյունավետ է գործել Ալեքսանդր Կարապետյանը, որը 3 գոլի հեղինակ է դարձել: «Սևանի» լավագույն ռմբարկուն 6 գնդակով Անդրե Մենսալաոն է:
- Վերջին երկու հանդիպումներում «Նոայի» դարպասապահ Գրիգորի Մաթևոսյանը հաջողությամբ հետ է մղել Անդրանիկ Ոսկանյանի («Վան») և Լիվիո Միլթսի («Ուրարտու») 11մ հարվածները՝ նպաստելով թիմի հաղթանակներին:
- «Սևանի» 20-ամյա դարպասապահ Դիոգո Ֆիգերեդոյին իրավամբ կարելի է ընթացիկ առաջնության հայտնությունը համարել: Նա առաջնության մասնակից միակ դարպասապահն է, որ դեռևս գոլ բաց չի թողել՝ 6 խաղ անընդմեջ դարպասը պահելով անառիկ: Դարպասն անառիկ պահած րոպեների քանակով նա արդեն տարիքային երկու ռեկորդ է սահմանել՝ գերազանցելով Անատոլի Այվազովի և Արսեն Պետրոսյանի ցուցանիշները, ինչպես նաև ընդգրկվել է դարպասապահների խորհրդանշական «500-ի ակումբում»:
Եթե Ֆիգերեդոյին հաջողվի «Նոայի» հետ խաղում առնվազն 60 րոպե դարպասն անառիկ պահել, ապա կդառնա ՀՀ առաջնությունների պատմության մեջ 6-րդ դարպասապահը, որը 600 և ավելի րոպե շարունակ գոլ բաց չի թողել: Ռեկորդակիրը «Շիրակի» նախկին դարպասապահ Ռայմոնդ Զադուրյանն է, որը 2002թ. առաջնությունում 755 րոպե շարունակ դարպասն անառիկ է պահել:
Որակազրկման պատճառով հանդիպմանը չի մասնակցի «Արարատ-Արմենիայի» հետ խաղում դաշտից հեռացված սևանցի Էբրիմա Ջատան:
