«Նոայի» հետ հանդիպման 87-րդ րոպեին մտնելով խաղադաշտ, ընդամենը մեկ րոպե անց Ժիրայր Շաղոյանը գրավեց մրցակցի դարպասը՝ բացելով գոլերի հաշիվը VBET Հայաստանի Պրեմիեր լիգայում և նպաստելով «Արարատ-Արմենիայի» խոշոր հաշվով հաղթանակին:
Շաղոյանը դարձավ Բարձրագույն խմբում «Արարատ-Արմենիայում» գոլ խփած ամենաերիտասարդ ֆուտբոլիստը: Նա Գրիգորի Մաթևոսյանի դարպասը գրավեց 20 տարեկան 137 օրականում: Շաղոյանը գերազանցեց Արթուր Դանիելյանի ցուցանիշը, որը թիմի կազմում գոլերի հաշիվը բացել էր 21 տարեկան 76 օրականում:
ԲԿՄԱ-ում անցկացրած 2 մրցաշրջաններից հետո վերադառնալով հարազատ կոլեկտիվ, Ժիրայր Շաղոյանն ընթացիկ առաջնությունում մասնակցել է 4 հանդիպման՝ ընդհանուր առմամբ խաղադաշտում գտնվելով ընդամենը 66 րոպե: Սակայն դա էլ բավական էր շնորհալի երիտասարդին Բարձրագույն խմբում գոլերի հաշիվը բացելու համար:
«Նոայի» հետ հանդիպումը Բարձրագույն խմբում Շաղոյանի անցկացրած ընդամենը 15-րդ խաղն էր: Ընդ որում բոլոր հանդիպումներում էլ նա փոխարինման է մտել: Բարձրագույն խմբում Շաղոյանը նորամուտը նշել է 2018թ. սեպտեմբերի 29-ին «Լոռիի» հետ կայացած առաջնության խաղում, որում գրանցվել էր գոլազուրկ ոչ-ոքի: Հանդիպման 90-րդ րոպեին գլխավոր մարզչի պարտականությունները կատարող Արտակ Օսեյանը Ժիրայրին խաղադաշտ էր մտցրել թիմի ռմբարկու Իվայլո Դիմիտրովի փոխարեն:
Մեր ընտրանին
-
Նշանակալի նվաճում՝ հավաքական վերադարձի նախաշեմին․ Հրայր Մկոյանը նման արդյունք գրանցած 13-րդ ֆուտբոլիստն է
-
Հայաստանի հավաքականը վերադառնում է. 3 բան, որ իմացանք Կապառոսի ասուլիսից
-
Բուչնևը` հայկական արմատների և Հայաստանի հավաքական հնարավոր հրավերի մասին
Այդ օրը պատանի ֆուտբոլիստը 17 տարեկան 172 օրական էր: Նա դարձել էր Բարձրագույն խմբում «Արարատ-Արմենիայում» հանդես եկած ամենաերիտասարդ ֆուտբոլիստը: Հետագայում նրա ցուցանիշը գերազանցեցին Նարեկ Ալավերդյանն (17 տարեկան 66 օրական) ու Արթուր Սերոբյանը (17 տարեկան 71 օրական): Բարձրագույն խմբում իր առաջին մրցաշրջանում Շաղոյանը մասնակցեց 11 հանդիպման:
Հաջորդ երկու մրցաշրջաններն անցկացնելով ԲԿՄԱ-ում, Ժիրայր Շաղոյանն Առաջին խմբի առաջնությունում լիովին դրսևորեց ռմբարկուի իր հատկանիշները: 2019/20թթ. առաջնությունում նա 23 գոլ խփեց, իսկ հաջորդ մրցաշրջանում 28 գնդակով դարձավ Առաջին խմբի մրցաշարի լավագույն ռմբարկուն:
VNews.am-ը ներկայացնում է VBET Հայաստանի Պրեմիեր լիգայում «Արարատ-Արմենիայում» գոլ խփած ամենաերիտասարդ ֆուտբոլիստների տասնյակը:
Ֆուտբոլիստներ | Տարիքը | Ամսաթիվն ու մրցակիցը |
1. Ժիրայր Շաղոյան | 20 տ. 137 օր. | 25.08.2021 «Նոա»՝ 5-2 |
2. Արթուր Դանիելյան | 21 տ. 76 օր. | 26.04.2019 «Արարատ»՝ 6-2 |
3. Արտյոմ Ավանեսյան | 22 տ. 15 օր. | 01.08.2021 «Ալաշկերտ»՝ 3-0 |
4. Զաքարիա Սանոգո | 22 տ. 322 օր. | 29.10.2019 «Ալաշկերտ»՝ 1-2 |
5. Պետրոս Ավետիսյան | 23 տ. 54 օր. | 02.03.2019 «Արարատ»՝ 4-1 |
6. Ուգոչուկվու Լուիս Օգանա | 23 տ. 111 օր. | 19.04.2019 «Լոռի»՝ 3-0 |
7. Կեյրոն Բատիստա Ռամոս | 23 տ. 239 օր. | 28.11.2018 «Բանանց»՝ 3-0 |
8. Վլադիսլավ Օսլոնովսկի | 23 տ. 265 օր. | 07.10.2018 «Արարատ»՝ 1-0 |
9. Դավիդ Հումանես | 23 տ. 339 օր. | 17.10.2020 «Շիրակ»՝ 7-0 |
10. Խոսե Ժունիոր Բուենո | 24 տ. 261 օր. | 22.05.2021 «Ալաշկերտ»՝ 1-2 |