Աշխաբադում կայացած ծանրամարտի Աշխարհի առաջնությունն օլիմպիական վարկանիշային էր: Նաև դա էր պատճառը, որ մրցավայր էին ժամանել 100 երկրների բոլոր ուժեղագույն մարզիկները: Հայաստանի հավաքականը մրցավայր էր մեկնել 8 ծանրորդով:
Կանանց հավաքական
Մեր կանանց հավաքականն ամենաերիտասարդներից մեկն է աշխարհում: Առաջատարների՝ Նազիկ Ավդալյանի և Հռիփսիմե խուրշուդյանի բացակայությամբ, դժվար է լուրջ խնդիրներ լուծել: Բայց 59 կգ քաշային Իզաբելա Յայլյանն իր նվազագույն խնդիրը լուծեց: Երկամարտի 210 կգ արդյունքով նա գրավեց 9-րդ տեղը և ստացավ վարկանիշային միավոր:
Ընդամենը 16 տարեկան Լիանա Գյուրջյանը հանդես եկավ Բ խմբում: Նա ցույց տվեց երկամարտի 195 կգ արդյունք և բավարարվեց 19-րդ հորիզոնականով: Լիանան այժմ նախապատրաստվելու է Աշխարհի պատանեկան առաջնությանը:
Մենք լուրջ ակնկալիքներ ունեինք 81 կգ քաշային Տաթևիկ Հակոբյանից: Ընդամենը մի քանի օր առաջ նա շատ լավ ելույթ էր ունեցել Լեհաստանում կայացած Եվրոպայի երիտասարդական առաջնությունում: Սակայն այնտեղ նա հանդես էր եկել ավելի բարձր քաշային կարգում: Հավանաբար հենց քաշ գցելն էլ խանգարեց, և մեդալի փոխարեն մենք ունեցանք զրո:
Գերծանր քաշային Արփինե Դալալայանն էլ դեռ շատ երիտասարդ է՝ այդ քաշում լուրջ արդյունք ցույց տալու համար: Սակայն 19-ամյա մեր մարզուհին կարող է ունենալ լավ ապագա: Այս անգամ, երկամարտի 239 կգ արդյունքով և հանգրվանեց 18-րդ հորիզոնականում:
