Նախկին ամուսիններ Ջոնի Դեփի և Էմբեր Հերդի միջև զրպարտության վերաբերյալ դատավարությանը հետևողներն ամեն ինչ անում են դատարանի դահլիճում տեղ ստանալու համար: Դերասանների երկրպագուներն անգամ մեքենաներով «ճամբար» են ստեղծել դատարանի շենքի դիմաց, իսկ նրանցից մեկը 30 հազար դոլար է ծախսել Մեծ Բրիտանիայից ԱՄՆ հասնելու, հյուրանոցներում մնալու, սնվելու և այլ կարիքներ հոգալու համար, գրում է People-ը։
Դեփի մի քանի երկրպագուներ դատարանի շենքի մոտ են եկել դատական նիստից ժամեր առաջ՝ համոզվելու համար, որ թույլտվություն կստանան դատարանի դահլիճում նստելու համար: «Ես նախկինում երբեք չեմ մասնակցել հանրային դատավարության: Հերթի պատճառով չեմ քնել, եկել եմ 00:45-ին»,- ասել է ներկաներից մեկը։
Որոշ երկրպագուներ էլ այլ երկրներից են մեկնել ԱՄՆ՝ դատավարությանը հետևելու համար: Դեփին աջակցող կանանցից մեկը որոշել է մեկնել Մեծ Բրիտանիայից։ Նա ասել է, որ մի ամբողջ գիշեր հերթ է կանգնել անձրևի տակ և թրջվել։