Netflix-ն աշխատանքից ազատել է մոտ 150 աշխատակցի՝ հիմնականում ԱՄՆ-ից, գրում է Variety-ն։
Կրճատումները բոլոր ստորաբաժանումներից են։ Դրանք կապված են ծախսերի կրճատման անհրաժեշտության, այլ ոչ թե առանձին մասնագետների արդյունավետության հետ։ Ընդհանուր առմամբ, Netflix-ի ԱՄՆ-ի աշխատուժի մոտավորապես 2 տոկոսն ազատվել է աշխատանքից:
«Այս փոփոխությունները հիմնականում պայմանավորված են բիզնեսի կարիքներով, ոչ թե անհատական կատարողականությամբ: Մեզանից ոչ ոք չի ցանկանում հրաժեշտ տալ նման հիանալի գործընկերներին: Մենք քրտնաջան աշխատում ենք նրանց աջակցելու համար այս բարդ ժամանակահատվածում», - ասել է սթրիմինգի ներկայացուցիչը:
Բացի 150 լրիվ դրույքով աշխատողներից, Netflix-ն իր անիմացիոն ստուդիայում վերացնում է կես դրույքով շուրջ 70 աշխատատեղ և կրճատում է ֆրիլանսերների թիվն իր սոցիալական լրատվամիջոցներում:
2021 թվականի դեկտեմբերի 31-ի դրությամբ ընկերությունն ուներ մոտավորապես լրիվ դրույքով աշխատող 11.300 աշխատակից ամբողջ աշխարհում, որի 76 %-ը (մոտ 8.600)՝ ԱՄՆ-ում և Կանադայում:
