Գերմանիայի ազգային հավաքականի ու ավստրիական «Զալցբուրգի» կենտրոնական հարձակվող Կարիմ Ադեյեմին մարզական կարիերան կշարունակի Դորտմունդի «Բորուսիայում»՝ հայտնում է հեղինակավոր ինսայդեր Ֆաբրիցիո Ռոմանոն:
Ռոմանոյի հաղորդմամբ՝ գործարքը կայացած է: Դորտմունդյան ակումբն այժմ պատրաստում է պայմանագիրը, որը կողմերը շուտով կստորագրեն:
«Զալցբուրգն» Ադեյեմիի տրանսֆերային վաճառքից կստանա մոտ 38 մլն եվրո: «Բորուսիայի» ու ֆուտբոլիստի պայմանագրում հրաժարագնի կետ չի լինի:
Կարիմ Ադեյեմիի՝ Դորտմունդի «Բորուսիա» տեղափոխությամբ ավելի է մեծանում հավանականությունը, որ Էրլինգ Հալանդն ամառային տրանսֆերային պատուհանին կփոխի ակումբային գրանցումը:
Հավելենք՝ 20-ամյա Ադեյեմին Ավստրիայի Բունդեսլիգայի ընթացիկ մրցաշրջանում անցկացրած 27 խաղում խփել է 19 գոլ, կատարել 4 գոլային փոխանցում: