Մեկնարկում է VBET Հայաստանի Պրեմիեր լիգայի 5-րդ տուրը:
Ձեր ուշադրությանն ենք ներկայացնում կայանալիք 5 հանդիպումներին վերաբերող ամենահետաքրքիր ու ամենաուշագրավ փաստերը:
«ԱԼԱՇԿԵՐՏ» – «ՍԵՎԱՆ»
23 օգոստոսի, ժ.17:00, Երևան, «Նաիրի» մարզադաշտ
VBET ՀՊԼ-ում մրցակիցներն առաջին անգամ են հանդիպելու
«Ալաշկերտ»՝ 9-րդ տեղ (0 միավոր), «Սևան»՝ 2-րդ տեղ (9 միավոր):
Հետաքրքիր 5 փաստ՝ հանդիպմանն ընդառաջ
1․ ՀՀ գործող չեմպիոն «Ալաշկերտի» համար VBET ՀՊԼ-ի հոբելյանական առաջնության մեկնարկն ամենաանհաջողն է թիմի պատմության մեջ: Ալաշկերտցիները ոչ միայն 2 անընդմեջ պարտություն են կրել, այլ նաև դեռ չեն բացել գոլերի հաշիվը՝ փոխարենը սեփական դարպասն ընդունելով 5 գնդակ, ինչը ևս հակառեկորդ է:
2․ Իսկ ահա «Սևանը» շատերի համար անսպասելի շատ հաջող է մեկնարկել՝ 4 հանդիպումներում վաստակելով 9 միավոր: Ընդ որում վերջին երկու խաղերում սևանցիները «Նորավանքի» և «Արարատի» նկատմամբ «չոր» հաշվով հաղթանակներ են տոնել թիմի նոր գլխավոր մարզիչ Պամբոս Քրիստոդուլուի գլխավորությամբ:
3․ «Սևանի» տոնած 3 հաղթանակներում էլ իր ծանրակշիռ ներդրումն է ունեցել թիմի հարձակվող Անդրե Մենսալաոն, որը հաղթական 3 հանդիպումներում էլ գոլերի հեղինակ է դարձել՝ ընդհանուր առմամբ 5 անգամ գրավելով մրցակիցների դարպասները: Մենսալաոն միանձնյա գլխավորում է առաջնության լավագույն ռմբարկուների ցանկը:
4․ Եթե «Սևանի» 20-ամյա դարպասապահ Դիոգո Ֆիգերեդոյին հաջողվի «Ալաշկերտի» հետ խաղում առնվազն 80 րոպե դարպասն անառիկ պահել, ապա ընթացիկ առաջնությունում անընդմեջ գոլ բաց չթողած րոպեների քանակը կհասցնի 260-ի և կգերազանցի Անատոլի Այվազովի տարիքային ռեկորդը: Վերջինս 20 տարեկանում «Շիրակի» կազմում դարպասը 259 րոպե շարունակ անառիկ էր պահել՝ ցույց տալով լավագույն արդյունքն այդ տարիքի այլազգի դարպասապահների մեջ:
5․ Հանդիպմանը մասնակցելու դեպքում «Սևանի» պաշտպան Արթուր Քարտաշյանը VBET ՀՊԼ–ի առաջնություններում հոբելյանական՝ 100-րդ խաղը կանցկացնի: