«Բարսելոնայի» նորանշանակ գլխավոր մարզիչ Ռոնալդ Կումանը տարիներ առաջ՝ 2007/08 մրցաշրջանում աշխատել է «Վալենսիայում»: «Չղջիկների» հետ նրա անցկացրած մրցաշրջանն անհաջող էր ոչ միայն խաղադաշտում, այլ նաև նրա՝ մի քանի ֆուտբոլիստների հետ ունեցած վատ հարաբերությունների առումով:
Այդ ժամանակ «Վալենսիայի» ավագն էր Դավիդ Ալբելդան, որի հետ հոլանդացու ջրերը նույն առվով չէին հոսում: Միասին աշխատելուց մի քանի տարի անց՝ 2014-ին իսպանացին թվիթերում գրառումով քննադատեց Կումանին, որը հիշել են իսպանական մամուլում. «Մարդիկ խոսում են Կումանի՝ «Բարսելոնան» գլխավորելու մասի՞ն. Երանի՜ նա գլխավորի «Բարսան», քանի որ այդպես Լա լիգան կդառնա հավասար առաջնություն», – գրել է Ալբելդան՝ նկատի ունենալով, որ «Բարսելոնան» Կումանի օրոք խաղամակարդակի անկում կապրի:
Hoy veo a gente hablar de Koeman. Ojalá algún día entrene al Barcelona así se igualaría algo la liga.
— david (@dalbelda) January 9, 2014
«Վալենսիայի» մեկ այլ առաջատար՝ Խոակինը նույնպես քննադատել էր հոլանդացուն հեռանալուց հետո. «5 ամսում Կումանը ոչնչացրեց «Վալենսիան»: Նա նույնիսկ քաջություն չունեցավ մեզ հրաժեշտ տալու և մեր դեմքին ասելու այն, ինչ մտածում է: Կումանը վատ մարզիչ է, ու ոչ այնքան լավ անձնավորություն», – ասել էր «Բետիսի» այժմյան ֆուտբոլիստը:
