Բասկետբոլի Հայաստանի հավաքականի առաջատար խաղացողներից Ալբերտ Թադևոսյանը փոքր երկրների Եվրոպայի առաջնությունում հաղթական մեկնարկից հետո խոսել է հետագա անելիքների մասին:
«Շատ ուրախ եմ, որ հաղթեցինք: Մինչև խաղն արդեն վերլուծել էինք մրցակցին, հասկացել էինք՝ ինչպիսի խաղ են ցուցադրում: Անկեղծ ասած՝ գիտակցում էինք, որ մեր խաղային մակարդակն ավելի բարձր է:
Մեր թիմը համալրել է Քրիս Ջոնսը, որը բավական ուժեղ խաղացող է: Նա մեզ նոր է միացել, պարզ է՝ խաղի սկզբում մի փոքր դժվար էր, քանի որ տարբեր կոմբինացիաներ էինք փորձարկում, բայց ընդհանուր առմամբ հանդիպման վերջնամասում ավելացրինք և կարողացանք միավորներով բավական առաջ անցնել:
Հաջորդ խաղերը շատ կարևոր են, զգում եմ, որ ավելին կարող եմ: Ամեն ինչ կանենք, որ յուրաքանչյուր խաղում հաղթենք և հասնենք մեր նպատակին»,- նշել է Թադևոսյանը ՀԲՖ մամուլի ծառայության հետ զրույցում:
Հիշեցնենք՝ նախօրեին Հայաստանի հավաքականը 100:63 հաշվով հաղթել էր Ջիբրալթարի թիմին՝ իր տեղն ապահովելով կիսաեզրափակիչում:
Այսօր՝ ժամը 18:15-ին, Հայաստանի հավաքականը B խմբի առաջին տեղը կվիճարկի Սան Մարինոյի ընտրանու հետ: Խաղը կարող եք դիտել «Վիվառո Արենա»-ի ուղիղ եթերում: