Ալեքսանդր Գրիգորյանը դարձավ Հայաստանի չեմպիոն թիմ պատրաստած 17-րդ մարզիչը: Սակայն, ի տարբերություն նման արդյունք գրանցած մյուս մարզիչների, Գրիգորյանի ցուցանիշն աննախադեպ է Հայաստանի առաջնություններում:
Ալեքսանդր Գրիգորյանն «Ալաշկերտը» գլխավորեց այն բանից հետո, երբ թիմն Աբրահամ Խաշմանյանի օրոք նախ գավաթի եզրափակչում պատվավոր մրցանակը զիջել էր «Արարատին», ապա առաջնության խաղում պարտվել «Վանին»: Այդ պահին «Ալաշկերտը» 4 միավորով հետ էր մնում առաջատար «Նոայից», որը երկու խաղ ավելի էր անցկացրել: Իսկ առջևում «Արարատի» և «Արարատ-Արմենիայի» հետ կայանալիք բախտորոշ 3 հանդիպումներն էին:
Դժվար չէ պատկերացնել, թե հոգեբանական ինչպիսի դժվարին վիճակում էին հայտնվել «Ալաշկերտի» ֆուտբոլիստները: Սակայն Ալեքսանդր Գրիգորյանն իր սաների հետ պատվով դուրս եկավ դժվարին փորձությունից: Հաղթելով ավարտական 3 խաղերում էլ, «Ալաշկերտն» իր պատմության մեջ 4-րդ անգամ նվաճեց Հայաստանի չեմպիոնի տիտղոսը: Այդ հաջողությունում, իհարկե, իրենց ներդրումն ունեն նաև առաջնության աշնանային հատվածում ալաշկերտցիների գործողությունները ղեկավարած Եղիշե Մելիքյանն ու հաջորդ 10 խաղերում թիմի ղեկը ստանձնած Աբրահամ Խաշմանյանը:
Որ ակումբին հավասարվեց «Ալաշկերտը» չեմպիոնական տիտղոսների քանակով
Իսկ ո՞րն է Ալեքսանդր Գրիգորյանի գրանցած արդյունքի յուրահատկությունը: Նախկինում էլ չեմպիոն հռչակված թիմերում մրցաշրջանի ընթացքում մարզչական փոփոխություններ են տեղի ունեցել և նոր մարզչին հաջողվել է նվաճել չեմպիոնական բարձունքը: Սակայն ի տարբերություն Ալեքսանդր Գրիգորյանի, նրանք թիմի ղեկը ստանձնել են ոչ թե առաջնության վերջնագծում, այլ շատ ավելի վաղ ու բավական ժամանակ են ունեցել ծանոթանալու ֆուտբոլիստների խաղային որակներին, անհրաժեշտ շտկումներ մտցնելու իրենց սաների գործողություններում:
ՀՀ առաջնությունների պատմության մեջ 9-րդ անգամ չեմպիոն հռչակված թիմում, մրցաշրջանի ընթացքում, մարզչական փոփոխություններ տեղի ունեցան: Հետաքրքիր է, որ դրանցից 3-ը կապված է հենց «Ալաշկերտի» հետ:
Չեմպիոնական 4 մրցաշրջաններից 3-ում «Ալաշկերտում» մարզչական փոփոխություններ են տեղի ունեցել: Միայն 2015/16թթ. առաջնությունում է «Ալաշկերտին» առաջին անգամ չեմպիոնական բարձունքին հասցրած Աբրահամ Խաշմանյանը մեկնարկից մինչև վերջնագիծ միայնակ գլխավորել թիմը:
Իսկ ահա, «Ալաշկերտի» համար չեմպիոնական հաջորդ մրցաշրջանում, թիմում մարզչական իսկական խառնաշփոթ էր ստեղծվել: Առաջնության 9-րդ տուրից հետո Խաշմանյանը պաշտոնանկ էր արվել: Հաջորդ երկու խաղերում գլխավոր մարզչի պարտականությունները կատարել էր Սերգեյ Էրզրումյանը, որից հետո թիմի ղեկը ստանձնել էր Կարեն Բարսեղյանը:
Առաջնության գարնանային հատվածի մեկնարկում, 18-20-րդ տուրերի հանդիպումներն ալաշկերտցիներն անցկացրել էին Արամ Ոսկանյանի գլխավորությամբ՝ տոնելով 3 անընդմեջ հաղթանակ: Սակայն անսպասելիորեն Ոսկանյանը հեռացել էր «Ալաշկերտից»՝ ընդունելով «Բանանցի» հրավերը, որից հետո Բագրատ Նավոյանը կրկին Աբրահամ Խաշմանյանին առաջարկել էր գլխավորել թիմն ավարտական 10 հանդիպումներում:
2017/18թթ. առաջնությունում էլ, երբ «Ալաշկերտը» 3-րդ անգամ անընդմեջ չեմպիոն էր հռչակվել, կրկին թիմում մարզչական փոփոխություն էր կատարվել: Այս անգամ Խաշմանյանի հերթական պաշտոնանկությունը գրանցվել էր 20-րդ տուրից հետո: Այդ պահին «Ալաշկերտը» 34 միավորով առաջատարն էր ու 3 միավորով գերազանցում էր «Շիրակին»: Թիմի ղեկը ստանձնած Վարուժան Սուքիասյանի գլխավորությամբ ալաշկերտցիներն ավարտական 10 հանդիպումներում 16 միավոր վաստակելով, պահպանել էին չեմպիոնի տիտղոսը:
Յուսուֆ Օտուբանջոյի ցուցանիշը վատագույնն է ՀՀ առաջնությունների լավագույն ռմբարկուների ցանկում
Ի դեպ, Վարուժան Սուքիասյանն առաջին մարզիչն է, որն առաջնության ընթացքում ստանձնելով թիմի ղեկը, իր սաներին չեմպիոնական բարձունքին է հասցրել: Դա տեղի է ունեցել 2000թ. Արարատի «Ցեմենտում», որն այդ տարի հանդես էր գալիս «Արաքս» անվանումով: Մեկնարկային 10 հանդիպումները թիմն անցկացրել էր Սամվել Պետրոսյանի գլխավորությամբ, որից հետո «Արաքսի» ղեկը հանձնվել էր Վարուժան Սուքիասյանին, որն էլ մեկամյա ընդմիջումից հետո իր սաներին կրկին ոսկե մեդալների էր արժանացրել:
Չեմպիոն հռչակված թիմերում մարզչական մյուս բոլոր 5 փոփոխություններն էլ տեղի են ունեցել «Փյունիկում» (2001թ.՝ Լևոն Յաբլուկյան, Սամվել Դարբինյան՝ 3-րդ տուրից, 2004թ.՝ Միխայ Ստոյկիցա, Վարդան Մինասյան՝ 9-րդ տուրից, 2005թ.՝ Վարդան Մինասյան, Հենկ Վիսման՝ 9-րդ տուրից, 2007թ.՝ Սամվել Պետրոսյան, Արմեն Գյուլբուդաղյանց՝ 4-րդ տուրից, 2008թ.՝ Արմեն Գյուլբուդաղյանց, Վարդան Մինասյան՝ 12-րդ տուրից):
Անդրադառնանք 2004թ. առաջնությունում Վարդան Մինասյանի բացառիկ ցուցանիշին: Մրցաշրջանի սկզբում նա թիմի գլխավոր մարզիչ Միխայ Ստոյկիցայի օգնականն էր: Վերջինս առաջնության 8-րդ տուրից հետո հեռացավ «Փյունիկից»: Նրա փոխարեն թիմի ղեկը ստանձնած Վարդան Մինասյանի նորամուտը գլխավոր մարզչի պաշտոնում պարզապես գերազանց ստացվեց: «Փյունիկը» 9-րդ տուրից սկսած 16 անընդմեջ հաղթանակ տոնեց, ինչը ՀՀ առաջնություններում մինչ օրս չգերազանցված ռեկորդ է:
Դա Վարդան Մինասյանի մարզչական կարիերայում չեմպիոնական առաջին բարձունքն էր, որին հասել էր 30 տարեկանում՝ դառնալով Հայաստանի չեմպիոն թիմ պատրաստած ամենաերիտասարդ մարզիչը: Այդ ցուցանիշը ևս մինչ օրս չի գերազանցվել:
Խորեն Հովհաննիսյանից հետո, որը 1990-ականներին «Փյունիկում» խաղացող-մարզչի կարգավիճակում էր, Մինասյանը 2-րդն էր, որ չեմպիոնի տիտղոսին արժանացել էր թե՛ որպես ֆուտբոլիստ, թե՛ որպես գլխավոր մարզիչ: Հետագայում նման հաջողության էին հասել նաև Սևադա Արզումանյանը, Սարգիս Հովսեփյանն ու Աբրահամ Խաշմանյանը:
Վարդան Մինասյանը մարզիչների մեջ յուրօրինակ ռեկորդակիր է չեմպիոնական տիտղոսների քանակով: Նրա գլխավորությամբ 4 անգամ չեմպիոն է հռչակվել «Փյունիկը», 2 անգամ ոսկե մեդալների է արժանացել «Արարատ-Արմենիան»:
VNews.am-ը ներկայացնում է այն մարզիչների ցանկը, որոնց գլխավորած թիմերը նվաճել են Հայաստանի չեմպիոնի տիտղոսը:
Մարզիչներ | Չեմպիոն | Ակումբ | Մրցաշրջան |
1.Վարդան Մինասյան | 6 | «Փյունիկ» «Արարատ-Արմենիա» | 2004, 2008-2010թթ. 2018/19, 2019/20թթ. |
2.Անդրանիկ Ադամյան | 3 | «Շիրակ» | 1992,1994,1999թթ. |
3.Խորեն Հովհաննիսյան | 3 | «Փյունիկ» | 1992, 1995/96, 1996/97թթ. |
4.Վարուժան Սուքիասյան | 3 | «Արաքս» «Ալաշկերտ» | 1998, 2000թթ. 2017/18թթ. |
5.Սամվել Դարբինյան | 2 | «Երևան» «Փյունիկ» | 1997թ. 2001թ. |
6.Աբրահամ Խաշմանյան | 2 | «Ալաշկերտ» | 2015/16, 2016/17թթ. |
7.Արմեն Սարգսյան | 1 | «Արարատ» | 1993թ. |
8.Օսկար Լոպես | 1 | «Փյունիկ» | 2002թ. |
9.Միխայ Ստոյկիցա | 1 | «Փյունիկ» | 2003թ. |
10.Հենկ Վիսման | 1 | «Փյունիկ» | 2005թ. |
11.Սամվել Պետրոսյան | 1 | «Փյունիկ» | 2006թ. |
12.Արմեն Գյուլբուդաղյանց | 1 | «Փյունիկ» | 2007թ. |
13.Սևադա Արզումանյան | 1 | «Ուլիս» | 2011թ. |
14.Վարդան Բիչախչյան | 1 | «Շիրակ» | 2012/13թթ. |
15.Ժոլտ Հոռնյակ | 1 | «Բանանց» | 2013/14թթ. |
16.Սարգիս Հովսեփյան | 1 | «Փյունիկ» | 2014/15թթ. |
17.Ալեքսանդր Գրիգորյան | 1 | «Ալաշկերտ» | 2020/21թթ. |