Ստամբուլում ընթացող կանանց բռնցքամարտի աշխարհի առաջնությունում մեկնարկած Հայաստանի 4 պատվիրակներից պայքարը շարունակում է միայն 70 կգ քաշային Անի Հովսեփյանը, որը, իր հաշվին գրանցելով երկու հաղթանակ, հասել է քառորդ եզրափակիչ։
Հայուհին արդեն պայքարից դուրս է թողել ուկրաինուհի Մարիա Սեդայային և ճապոնուհի Արիսա Ցուբատային, որոնց նկատմամբ տարել է վստահ հաղթանակներ։ Այսօր՝ ցերեկային մրցահերթում, Անին քառորդ եզրափակիչ փուլում մրցելու է իռլանդուհի Էդել Լիզա Օ՛Քոնորի հետ։ Զույգի հաղթողն առնվազն բրոնզե մեդալ կապահովի։
1/8 եզրափակիչի արգելքը չհաղթահարեցին մեր մյուս երկու մարզուհիները. Անուշ Գրիգորյանը (50 կգ) և Եկատերինա Սիչևան (54 կգ) առաջխաղացման իրավունքը զիջեցին համապատասխանաբար ուզբեկ մարզուհի Ազիզա Յակուբովային և թրքուհի Հատիս Ակբասին։
Ավելի վաղ առաջին փուլում Գայանե Տեր-Բարսեղյանը (48 կգ) պարտվել էր լեհուհի Նատալյա Ռոկին։