Իտալիայի հավաքականի նախկին գլխավոր մարզիչ Անտոնիո Կոնտեն խոսել է ԵՎՐՈ 2020-ի կիսաեզրափակիչում Իտալիայի ու Իսպանիայի հավաքականների միջև կայացած խաղի մասին:
«Ես մշտապես մեծ հարգանքով եմ վերաբերվել Լուիս Էնրիկեին, իսկ Իսպանիայի հավաքականն իսկապես լավ Եվրո անցկացրեց:
Կարդացածիս ու լսածիս ֆոնին, ամեն դեպքում, փոքր-ինչ վերապահումով եմ մոտենում նրանց խաղաոճին: Ասում էին, թե իսպանացիները գերիշխում էին խաղադաշտում, բայց իմ ընկալումով՝ գերիշխում ես այն ժամանակ, երբ ստեղծում ես ավելի շատ գոլային պահեր, ավելի շատ հնարավորություններ:
Այս տեսանկյունից նրանց առավելությունն ակնհայտ չէր: Կարող ես գնդակը վերահսկել այնքան, որքան ցանկանում ես, բայց եթե գոլային հնարավորություններ չստեղծես ու դրանք չիրացնես, չես հաղթի»,- Ջանլուկա դի Մարցիոն իր կայքում մեջբերում է Կոնտեի խոսքը: