Մեկնարկում է VBET Հայաստանի Պրեմիեր լիգայի 8-րդ տուրը:
Ձեր ուշադրությանն ենք ներկայացնում կայանալիք 5 հանդիպումներին վերաբերող ամենահետաքրքիր ու ամենաուշագրավ փաստերը:
«ԱԼԱՇԿԵՐՏ» – ԲԿՄԱ
27 սեպտեմբերի, ժ.16:00, Երևան, «Նաիրի» մարզադաշտ
VBET ՀՊԼ-ում մրցակիցներն առաջին անգամ են հանդիպելու
«Ալաշկերտ»՝ 9-րդ տեղ (2 միավոր), ԲԿՄԱ՝ 10-րդ տեղ (0 միավոր):
Հետաքրքիր 5 փաստ՝ հանդիպմանն ընդառաջ
- Առաջնության բացարձակ հետնապահի հետ հանդիպումն «Ալաշկերտի» համար վերջին փորձամրցումն է ֆիննական ՀԻԿ-ի հետ սեպտեմբերի 30-ին Երևանում կայանալիք Կոնֆերենցիաների լիգայի խմբային մրցաշարի խաղից առաջ: Ալաշկերտցիներն այս հանդիպմանը բարձր տրամադրությամբ են նախապատրաստվել, քանի որ օրեր առաջ «Արարատի» հետ մրցավեճում դարձել էին եռակի սուպերգավաթակիրներ:
- ԲԿՄԱ-ի հետ հանդիպմանն «Ալաշկերտը» նախապատրաստվել է նոր գլխավոր մարզիչ, 58-ամյա սերբ մասնագետ Միլան Միլանովիչի գլխավորությամբ, որը փոխարինել է վերջերս թիմից հեռացած Ալեքսանդր Գրիգորյանին: Միլանովիչն «Ալաշկերտի» ղեկը ստանձնած այլազգի առաջին մարզիչն է: Հիշեցնենք, որ Ալեքսանդր Գրիգորյանն «Ալաշկերտի» գլխավոր մարզչի պաշտոնը ստանձնել էր նախորդ առաջնության վերջնագծում: Նրա օրոք անցկացրած 3 հանդիպումներում էլ հաղթելով, «Ալաշկերտը» չեմպիոն էր հռչակվել: Իսկ ահա ընթացիկ առաջնության մեկնարկային 5 խաղերում Գրիգորյանի օրոք թիմն ընդամենը 2 միավոր է վաստակել:
- ԲԿՄԱ-ին առայժմ չի հաջողվում միավոր վաստակել առաջնությունում: Ավելին, վերջին երկու հանդիպումներում բանակային ֆուտբոլիստներին չի հաջողվել գտնել մրցակիցների դարպասի բանալին՝ միևնույն 0-2 հաշվով զիջելով «Սևանին» ու «Արարատին»:
- Հանդիպմանը մասնակցելու դեպքում «Ալաշկերտի» ավագ Արտակ Գրիգորյանը երկու հաճելի հոբելյան կնշի: Նա թիմի մարզաշապիկով կանցկացնի VBET ՀՊԼ-ում 150-րդ, իսկ պաշտոնական մրցումներում՝ 200-րդ խաղը: Երկու ցուցանիշներով էլ Գրիգորյանը թիմի ռեկորդակիրն է:
- «Ալաշկերտի» մեկ այլ ֆուտբոլիստի՝ Ռումյան Հովսեփյանի համար էլ ԲԿՄԱ-ի հետ հանդիպումը կլինի 200-րդը Բարձրագույն խմբի առաջնություններում:
