«Սևանի» պորտուգալացի 20-ամյա դարպասապահ Դիոգո Ֆիգերեդոն կամ պարզապես Դիդին նոր նվաճման հասավ: Օգոստոսի 13-ին «Նորավանքի» հետ խաղում նշելով նորամուտը VBET ՀՊԼ-ում, Ֆիգերեդոն անցկացրած բոլոր 5 խաղերում էլ դարպասն անառիկ է պահել՝ ընդհանուր առմամբ գոլ բաց չթողնելով 450 րոպե շարունակ:
Այս ցուցանիշը ռեկորդային է ՀՀ առաջնություններում ելույթ ունեցած 20-ամյա դարպասապահների մեջ: Դիոգո Ֆիգերեդոն գերազանցեց «Փյունիկի» նախկին դարպասապահ Արսեն Պետրոսյանի ռեկորդային ցուցանիշը: Վերջինս 2011թ. առաջնությունում 20 տարեկանում դարպասը 405 րոպե շարունակ անառիկ էր պահել:
Հիշեցնենք, որ պորտուգալացի դարպասապահը մինչ այդ տարիքային ռեկորդ էր սահմանել այլազգի դարպասապահների մեջ՝ գերազանցելով Անատոլի Այվազովի տարիքային ռեկորդը: Վերջինս 2016թ. 20 տարեկանում պաշտպանելով «Շիրակի» դարպասը, 259 րոպե շարունակ առաջնությունում գոլ բաց չէր թողել:
Արսեն Պետրոսյանի ռեկորդը գերազանցելու համար Դիոգո Ֆիգերեդոյին անհրաժեշտ էր «Փյունիկի» հետ կայացած 7-րդ տուրի խաղում առնվազն 46 րոպե գոլ բաց չթողնել: Սակայն պորտուգալացին գերակատարեց իր առջև դրված խնդիրը և 5-րդ անընդմեջ խաղում էլ դարպասն անառիկ պահեց: Նա առաջնության մասնակից միակ դարպասապահն է, որն առայժմ գոլ բաց չի թողել:
Դիոգո Ֆիգերեդոն լավ հնարավորություն ունի ընդգրկվելու դարպասապահների խորհրդանշական «500-ի ակումբի» կազմում: Դրա համար նրան անհրաժեշտ է «Արարատ-Արմենիայի» հետ հաջորդ տուրում կայանալիք մրցավեճում դարպասն անառիկ պահել առնվազն 50 րոպե, ինչը բարդ խնդիր է՝ հաշվի առնելով մրցակցի ցուցադրած արդյունավետ խաղն ընթացիկ առաջնությունում:
VNews.am-ը ներկայացնում է ՀՀ առաջնություններում դարպասն անընդմեջ անառիկ պահած րոպեների քանակով դարպասապահների տարիքային ռեկորդները:
| Տարիք | Դարպասապահ | Ակումբ | Րոպե | Ժամանակահատված |
| 16 | Հայկ Դանիելյան | «Բանանց» | 196 | 30.05-09.11.1993 |
| 17 | Ապուլա Բետե | «Փյունիկ» | 446 | 27.10-22.11.2003 |
| 18 | Անատոլի Այվազով | «Փյունիկ» | 327 | 18.10-18.11.2014 |
| 19 | Ապուլա Բետե | «Փյունիկ» | 434 | 16.06-06.07.2005 |
| 20 | Դիոգո Ֆիգերեդո | «Սևան» | 450 | 13.08.-23.09.2021 |
| 21 | Արսեն Բեգլարյան | «Ուլիս» | 539 | 10.08-31.08.2014 |
| 22 | Ֆելիքս Հակոբյան | «Միկա» | 541 | 22.06-02.08.2003 |
| 23 | Գրիգոր Մելիքսեթյան | «Փյունիկ» | 549 | 22.03-13.05.2009 |
| 24 | Արթուր Հովհաննիսյան | «Շիրակ» | 681 | 10.04.-25.05.1992 |
| 25 | Էդիկ Երիցյան | «Կոտայք» | 599 | 12.08-29.09.1996 |
| 26 | Գարեգին Նաջարյան | «Բանանց» | 576 | 09.04-10.05.1992 |
| 27 | Տիգրան Ասլանյան | «Էրեբունի» | 544 | 07.04-26.07.1999 |
| 28 | Ստեփան Ղազարյան | «Արարատ» | 580 | 14.09-09.11.2013 |
| 29 | Արթուր Հովհաննիսյան | «Շիրակ» | 644 | 07.08-26.09.1997 |
| 30 | Վլադիմիր Մալկով | «Ուլիս» | 530 | 17.04-06.06.2010 |
| 31 | Ռայմոնդ Զադուրյան | «Շիրակ» | 755 | 04.07-30.09.2002 |
| 32 | Արթուր Հովհաննիսյան | «Շիրակ» | 520 | 30.04-13.06.2002 |
| 33 | Ռայմոնդ Զադուրյան | «Շիրակ» | 311 | 12.09-27.09.2004 |
| 34 | Արմեն Ավագյան | «Փյունիկ» | 595 | 15.08-14.10.1996 |
| 35 | Գևորգ Կասպարով | «Միկա» | 380 | 01.03-18.04.2015 |
| 36 | Էդիկ Երիցյան | «Գանձասար» | 396 | 14.04-19.05.2007 |
| 37 | Գևորգ Կասպարով | «Գանձասար-Կապան» | 438 | 19.08-18.11.2017 |
| 38 | Գևորգ Կասպարով | «Գանձասար-Կապան» | 274 | 01.09.-21.10.2018 |
| 39 | Գևորգ Կասպարով | «Գանձասար-Կապան» | 254 | 01.05.-03.08.2019 |
| 40 | Ռոբերտ Պալյան | «Կանազ» | 166 | 02.06-25.07.1992 |
