Առաջնության 7-րդ տուրում հերթական հաղթանակները տոնելով, «Արարատ-Արմենիան» ու «Արարատն» ավելի մեծացրին միավորների տարբերությունն իրենց հետապնդողներից: Իսկ ահա գործող չեմպիոն «Ալաշկերտին» առայժմ ոչ մի կերպ չի հաջողվում անդրանիկ հաղթանակը տոնել:
Տուրի ամենաուշագրավ իրադարձությունները ներկայացնում ենք 10 փաստի տեսքով:
- Տուրն անցավ հյուրերի առավելությամբ, որոնք տոնեցին 2 հաղթանակ, կրեցին մեկ պարտություն, 2 խաղ էլ ավարտեցին ոչ-ոքի: Առաջնությունում կայացած 33 հանդիպումներից 15-ում հաղթել են դաշտի տերերը, 13-ում հաջողությունն ուղեկցել է հյուրերին, 5-ում գրանցվել է ոչ-ոքի:
7-րդ տուրում գրանցվեց ընթացիկ առաջնության ամենացածր արդյունավետությունը. 5 հանդիպումներում խփվեց ընդամենը 8 գոլ (միջինը՝ 1,6 գոլ մեկ խաղում): Անցկացված 33 հանդիպումներում գրանցվել է 97 գոլ (միջինը՝ 2,9 գոլ մեկ խաղում):
- «Արարատ-Արմենիան» շարունակեց հաղթարշավը՝ մեկնարկից տոնելով 7-րդ անընդմեջ հաղթանակը: Այս ցուցանիշը ոչ միայն ռեկորդային է թիմի պատմության մեջ, այլև լավագույնն է վերջին 13 առաջնություններում: Մինչ այդ, 2008թ. «Արարատն» էր մեկնարկային 7 հանդիպումներում էլ հաղթել:
Իսկ ՀՀ առաջնությունների բացարձակ ռեկորդը «Փյունիկին» է պատկանում: 2002թ. փյունիկցիներն արգենտինացի Օսկար Լոպեսի գլխավորությամբ առաջնությունում մեկնարկել էին 14 անընդմեջ հաղթանակով: Ճիշտ է, այդ հաղթանակներից մեկը տեխնիկական էր: 5-րդ տուրում «Արարատը» խաղասկզբում լքել էր խաղադաշտը և «Փյունիկին» 3-0 հաշվով տեխնիկական հաղթանակ էր գրանցվել:
«Արարատ-Արմենիան» ընթացիկ առաջնությունում խոշոր հաշվով 4-րդ հաղթանակը տոնեց, ինչը ևս լավագույն արդյունքն է մասնակից թիմերի մեջ: ՀՀ կրկնակի չեմպիոնը մինչ այդ միևնույն 3-0 հաշվով հաղթել էր «Ալաշկերտին» և «Փյունիկին», 5-2 հաշվով առավելության էր հասել «Նոայի» նկատմամբ:
- Իսկ ահա «Ալաշկերտի» համար մեկնարկը շարունակում է մնալ ամենաանհաջողներից մեկը թիմի պատմության մեջ: Առաջնության 5-րդ խաղում էլ ալաշկերտցիներին չհաջողվեց հաղթանակ տոնել: «Ալաշկերտը» կրկնեց 2013/14թթ. մրցաշրջանի իր վատագույն արդյունքը՝ մեկնարկային 5 հանդիպումներում վաստակելով ընդամենը 2 միավոր:
2013/14թթ. մրցաշրջանում նորամուտը նշելով Բարձրագույն խմբում, «Ալաշկերտը» միայն 11-րդ խաղում էր առաջին հաղթանակը տոնել, երբ թիմի ղեկը ստանձնել էր Արմեն Գյուլբուդաղյանցը:
- Պամբոս Քրիստոդուլուի գլխավորությամբ «Սևանը» շարունակեց իր անպարտելի խաղերի շարքն առաջնությունում: Նրա օրոք VBET ՀՊԼ-ի նորեկն անցկացրած 5 հանդիպումներում 11 միավոր է վաստակել՝ տոնելով 3 հաղթանակ, 2 խաղ ավարտելով գոլազուրկ ոչ-ոքի, դարպասը պահելով անառիկ: