տուր
01 Հունվար 1970 - 12:11
- Թեև «Արարատը» «Վանի» հետ մրցավեճում երկու կարևոր միավոր կորցրեց, սակայն պահպանեց առաջատարի դիրքը: «Ալաշկերտն» օգտվելով չեմպիոնի «սայթաքումից», ընդհուպ մոտեցավ առաջատարին, իսկ «Ուրարտուն» 2021թ. առաջին հաղթանակը տոնելով, միացավ մեդալների համար պայքարող թիմերին:
Տուրի ամենաուշագրավ իրադարձությունները ներկայացնում ենք 10 փաստի տեսքով:
1․ Առաջնության 16-րդ տուրն անցավ հյուրերի առավելությամբ, որոնք տոնեցին 2 հաղթանակ, կրեցին մեկ պարտություն, մեկ խաղում էլ գրանցվեց գոլազուրկ ոչ-ոքի: Առաջնությունում կայացած 63 հանդիպումներից 22-ում հաղթել են դաշտի տերերը, 25-ում հաջողությունն ուղեկցել է հյուրերին, 16 խաղ ավարտվել է ոչ-ոքի:
Դավիդ Կամպանյան ստացավ VBET Հայաստանի Պրեմիեր լիգայի մրցանակը (տեսանյութ)
4 խաղում խփվեց ընդամենը 6 գոլ: Առաջնությունում կայացած 63 հանդիպումներում 132 գոլ է գրանցվել: Միջին արդյունավետությունը կազմում է 2,09 գոլ մեկ խաղում:
2․ «Արարատը» 9-րդ անպարտելի խաղն անցկացրեց և գերազանցեց «Արարատ-Արմենիայի» ռեկորդային ցուցանիշը: Ի դեպ, հենց արարատցիներն էին ընդհատել չեմպիոնի 8 անպարտելի խաղերի շարքը: Վերջին 9 հանդիպումներում արարատցիները 19 միավոր են վաստակել՝ տոնելով 5 հաղթանակ, 4 խաղ ավարտելով ոչ-ոքի:
3. «Ուրարտուն» 2021թ. առաջին հաղթանակը տոնելով, ընդհատեց «Արարատ-Արմենիայի» հետ հանդիպումներում առանց հաղթանակների 5 խաղերի շարքը, որոնցից 2-ում պարտվել էր, 3-ում գրանցվել էր ոչ-ոքի: Այս հաղթանակը 2-րդն էր չեմպիոնի նկատմամբ ՀՀ առաջնություններում: Առաջինը գրանցվել էր 2018թ. սեպտեմբերի 23-ին՝ 3-1:
4․ «Փյունիկը» վերջապես անդրանիկ հաղթանակը տոնեց առաջնությունում, որն առաջինն էր նաև Եղիշե Մելիքյանի գլխավորությամբ: Այսպիսով, ընդհատվեց փյունիկցիների առանց հաղթանակների 11 խաղերի շարքը: Դա վատագույն արդյունքն է թիմի պատմության մեջ: Մինչ այդ վատագույն ցուցանիշը գրանցվել էր 2017/18թթ. առաջնության մեկնարկում, երբ Ալեքսեյ Երյոմենկոյի գլխավորությամբ փյունիկցիները 9 խաղ անընդմեջ չէին հաղթել:
Հետաքրքիր է, որ «Փյունիկն» առաջին հաղթանակը տոնեց հենց «Շիրակի» հետ մրցավեճում, որն իր միակ հաղթանակն առաջնությունում տոնել էր փյունիկցիների նկատմամբ միևնույն 2-0 հաշվով:
5․ Արտակ Գրիգորյանը դարձավ Բարձրագույն խմբում «Ալաշկերտում» գոլ խփած ամենատարեց երկրորդ ֆուտբոլիստը: Նա «Լոռիի» հետ խաղում հաղթական գնդակը խփեց 33 տարեկան 132 օրականում: Գրիգորյանն այդ ցուցանիշով զիջում է միայն Դենիս Թումասյանին, որն աչքի էր ընկել 34 տարեկան 25 օրականում: ՀՀ առաջնություններում Գրիգորյանն իր նախորդ գոլը խփել էր 2016թ. նոյեմբերի 5-ին՝ գրավելով «Բանանցի» դարպասը: Բարձրագույն խմբում Արտակի օգտին 19-րդ գոլը գրանցվեց, որից 4-ը նա խփել է «Ալաշկերտում»:
