VNews.am-ը շարունակում է VBET Հայաստանի Պրեմիեր լիգայի 30-րդ առաջնության աշնանային հատվածում թիմերի ելույթների ամփոփումը: Այսօր կանդրադառնանք «Արարատին»:
1. «Արարատը» Վարդան Բիչախչյանի գլխավորությամբ հաջող հանդես եկավ 30-րդ առաջնության աշնանային հատվածում՝ 15 հանդիպումներում վաստակած 30 միավորով (+9=3-3, 31-17) զբաղեցնելով 3-րդ հորիզոնականը: «Սևանի» հետ չեղարկված 2 հանդիպումներից մեկում արարատցիները պարտվել էին (0-2), մյուսում հաղթել էին 3-1 հաշվով:
«Արարատի» ներկայիս արդյունքը 5 միավորով գերազանցում է նախորդ առաջնության մեկնարկային 15 հանդիպումներում թիմի գրանցած ցուցանիշը (+7=4-4, 19-10):
2. «Արարատը» սեփական դաշտում անցկացրած 8 հանդիպումներում վաստակեց 18 միավոր (+6=0-2, 18-10), ինչը հնարավոր միավորների 75 տոկոսն է: Առայժմ միայն «Փյունիկին» (1-0) և «Արարատ-Արմենիային» (3-0) է հաջողվել հյուրընկալվելիս հաղթել «Արարատին»:
Մրցակցի հարկի տակ անցկացրած 7 հանդիպումներում արարատցիները վաստակեցին 12 միավոր (+3=3-1, 13-7), ինչը հնարավոր միավորների 57,1 տոկոսն է: Մրցակցի հարկի տակ արարատցիները հաղթել են «Վանին» (1-0), ԲԿՄԱ-ին (2-0) և «Փյունիկին» (6-2):
3. «Արարատն» առաջնությունում 2 անգամ 3 անընդմեջ հաղթանակ տոնեց, 4 խաղ մնաց անպարտելի:
15 հանդիպումներից միայն 3-ում («Փյունիկ»՝ 0-1, «Արարատ-Արմենիա»՝ 0-3, «Ալաշկերտ»՝ 0-1) «Արարատը» չկարողացավ գրավել մրցակիցների դարպասը: Սեփական դարպասն «Արարատն» անառիկ պահեց ընդամենը 4 խաղում:
«Արարատի» ֆուտբոլիստները խոշոր հաշվով 2 հաղթանակ տոնեցին՝ առավելության հասնելով «Նոայի» (7-1) և «Փյունիկի» (6-2) նկատմամբ:
4. «Արարատի» մասնակցությամբ հանդիպումներում նշանակվել է 11մ 3 հարված, որից իրացվել է 2-ը: «Արարատի» օգտին նշանակված 11մ միակ հարվածը, որը կատարել է Սերժ Դեբլեն, հետ է մղել ալաշկերտցի Օգնեն Չանչարևիչը:
«Արարատի» դարպասին նշանակված 11մ 2 հարվածներն էլ դիպուկ են իրացրել ալաշկերտցի Ժոզե Էմբալուն և փյունիկցի Ուգո Ֆիրմինոն:
5. «Արարատն» արդյունավետությամբ 2-րդն է «Արարատ-Արմենիայից» հետո՝ 15 հանդիպումներում խփելով 31 գնդակ: Գոլերի հեղինակներ դարձան թիմի 8 ֆուտբոլիստներ, որոնցից Սերժ Դեբլեն, Հովհաննես Նազարյանը, Ալիկ Առաքելյանը, Դոնիմանի Յակուբա Սիլուեն և Իսահ Ալիյուն բացեցին գոլերի հաշիվն «Արարատում»:
Առավել արդյունավետ գործեց Սերժ Դեբլեն՝ 13 գնդակով գլխավորելով առաջնության աշնանային հատվածի լավագույն ռմբարկուների ցանկը: Մեկ գնդակ էլ նա խփել է «Սևանի» հետ չեղարկված խաղում: Այնպես որ նա 14 գնդակով «Արարատի» ամենաարդյունավետ լեգեոնականների ցանկում զբաղեցնում է 4-րդ հորիզոնականը:
«Արարատի» 32-ամյա հարձակվողը տարիքային ռեկորդ սահմանեց՝ գերազանցելով «Ուլիսի» նախկին լեգեոնական Գեորգի Կրասովսկու արդյունավետության ցուցանիշը: Վերջինս այդ տարիքում ՀՀ առաջնություններում հանդես եկած լեգեոնականներից բոլորից արդյունավետ էր գործել՝ խփելով 8 գնդակ: «Արարատի» ֆուտբոլիստներից այդ տարիքի ռեկորդը պատկանում էր 4 գոլ խփած Արա Նիգոյանին և Դենիս Դեդեչկոյին:
Դեբլեն ընդգրկվեց VBET ՀՊԼ-ում «Արարատում» գոլ խփած ամենատարեց ֆուտբոլիստների տասնյակում: «Փյունիկի» հետ առաջնության աշնանային հատվածի վերջին խաղում, որում Դեբլեն հեթ-տրիկի հեղինակ էր դարձել, իվուարցի ֆուտբոլիստը 32 տարեկան 71 օրական էր: Նա տասնյակից դուրս մղեց Արա Հակոբյանին, որն աչքի էր ընկել 31 տարեկան 149 օրականում:
6. Արդյունավետության տարիքային նոր ռեկորդի հեղինակ դարձավ նաև 19-ամյա Դոնիմանի Յակուբա Սիլուեն: Նա 2021թ. օրացուցային տարում ՀՀ առաջնությունների հանդիպումներում ընդհանուր առմամբ 7 գոլ խփեց (1-ը՝ «Շիրակում», 6-ը՝ «Արարատում») և գերազանցեց նախկին փյունիկցի Մամադու Դիավարայի տարիքային ռեկորդը: Վերջինս 2001թ. այդ տարիքում 5 գոլի հեղինակ էր դարձել:
Սիլուեն ընդգրկվեց «Արարատում» գոլի հեղինակ դարձած ամենաերիտասարդ լեգեոնականների տասնյակում: «Նոայի» հետ կայացած առաջնության մեկնարկային խաղում Սիլուեն հեթ-տրիկ ձևակերպեց 19 տարեկան 213 օրականում: Նա տասնյակից դուրս թողեց Մարկոս Պիզելիին, որն իր առաջին գոլն «Արարատում» խփել էր 21 տարեկան 256 օրականում: Սիլուեն ընդգրկվեց նաև «Արարատում» հանդես եկած ամենաերիտասարդ լեգեոնականների տասնյակում:
7. «Փյունիկի» հետ առաջնության աշնանային հատվածի վերջին խաղում Դմիտրիե Պոբուլիչի խփած 2-րդ գնդակը ՀՀ առաջնություններում «Արարատի» հոբելյանական՝ 1250-րդ գոլն էր: Իսկ Պոբուլիչը թիմի կազմում խփած 7 գոլով ընդգրկվեց ամենաարդյունավետ լեգեոնականների տասնյակում, որը 44 գնդակով գլխավորում է Մարկոս Պիզելին:
Իգոր Ստանոևիչն ընդգրկվեց VBET ՀՊԼ-ում «Արարատում» գոլ խփած ամենատարեց լեգեոնականների տասնյակում՝ «Ուրարտուի» դարպասը գրավելով 29 տարեկան 295 օրականում: Իսկ Խուան Բրավոն (31 տարեկան 254 օրական) ընդգրկվեց «Արարատում» հանդես եկած ամենատարեց լեգեոնականների տասնյակում:
Ալիկ Առաքելյանը, Էդգար Մալաքյանն ու Դավիթ Մանոյանն առաջնության ընթացքում Բարձրագույն խմբում հոբելյանական՝ 200-րդ հանդիպումներն անցկացրին: Առաքելյանը դարձավ ՀՀ առաջնություններում 200 խաղի սահմանագիծն ամենաերիտասարդ տարիքում (25 տարեկան 154 օրական) հատած ֆուտբոլիստը:
8. Վսևոլոդ Երմակովն առանց փոխարինման «Արարատի» դարպասը պաշտպանեց անցկացրած բոլոր 15 հանդիպումներում՝ բաց թողնելով 17 գոլ (միջինը մեկ խաղում՝ 1,13 գոլ): 4 խաղում նա դարպասն անառիկ պահեց: ՀՀ առաջնություններում «Արարատում» անցկացրած խաղերի ընդհանուր քանակով (39) Երմակովն ընդգրկվեց թիմի ամենափորձառու լեգեոնականների տասնյակում՝ ցանկից դուրս թողնելով Իվան Սպիչկային (34 խաղ): Այդ ցանկը գլխավորում է բրազիլացի Ռենատո դե Մորայեսը, որն «Արարատում» 92 խաղ է անցկացրել:
25-ամյա Երմակովն «Արարատում» անցկացրած խաղերի ընդհանուր քանակով նաև գերազանցեց Սերգեյ Ռևյակինի տարիքային տեկորդը, որն այդ տարիքում թիմի կազմում հանդես եկած լեգեոնականներից բոլորից շատ՝ 24 խաղ էր անցկացրել:
9. Առաջնության աշնանային հատվածում «Արարատում» հանդես եկած ամենատարեց ֆուտբոլիստը թիմի 35-ամյա ավագ Հրայր Մկոյանն էր: Օգոստոսի 24-ին «Նորավանքի» հետ մրցավեճում նա հայկական ակումբներում և ՀՀ ազգային ու երիտասարդական հավաքականներում պաշտոնական մրցումներում հոբելյանական՝ 400-րդ խաղն անցկացրեց: Մկոյանը նաև ինչպես «Արարատում» (80), այնպես էլ Բարձրագույն խմբում անցկացրած խաղերի ընդհանուր քանակով (285) թիմի ներկայիս կազմի ամենափորձառու ֆուտբոլիստն էր:
Իսկ 19-ամյա Դոնիմանի Յակուբա Սիլուեն արարատցիներից ամենաերիտասարդն էր:
10. Առաջնության աշնանային հատվածում «Արարատի» կազմում խաղադաշտ դուրս եկան 22 ֆուտբոլիստներ, որոնցից 10-ը լեգեոնականներ էին: 11 ֆուտբոլիստներ՝ Սերժ Դեբլեն, Հովհաննես Նազարյանը, Ալիկ Առաքելյանը, Դոնիմանի Յակուբա Սիլուեն, Գոռ Մալաքյանը, Իվան Սանտիագո Դիազը, Ռոբերտ Դարբինյանը, Ռոբերտ Հակոբյանը, Ռուդիկ Մկրտչյանը, Իսահ Ալիյուն և Ամարա Տրաորեն նորամուտը նշեցին «Արարատում»:
Արարատցիները 26 անգամ զգուշացվել են, Սերժ Դեբլեն հեռացվել է խաղադաշտից: Առավել հաճախ՝ 5 անգամ դեղին քարտի է արժանացել Խուան Բրավոն:
VNews.am-ը ներկայացնում է «Արարատի» ֆուտբոլիստների ցուցանիշներն ընթացիկ առաջնության աշնանային հատվածում (ներառյալ նաև «Սևանի» հետ չեղարկված 2 խաղերը):
| Ֆուտբոլիստներ | Խաղ | Գոլ | Զ (Հ) |
| 1. Վսևոլոդ Երմակով | 17 | -20 | 1 |
| 2. Դմիտրիե Պոբուլիչ | 17 | 4 | 2 |
| 3. Էդգար Մալաքյան | 17 | 3 | 1 |
| 4. Ժիրայր Մարգարյան | 17 | – | – |
| 5. Դավիթ Մանոյան | 17 | – | 2 |
| 6. Գոռ Մալաքյան | 17 | – | 3 |
| 7. Խուան Բրավո | 17 | – | 5 |
| 8. Ալիկ Առաքելյան | 16 | 4 | – |
| 9. Իսահ Ալիյու | 16 | 1 | 2 |
| 10. Դոնիմանի Յակուբա Սիլուե | 15 | 6 | 2 |
| 11. Սերժ Դեբլե | 14 | 14 | -(1) |
| 12. Հրայր Մկոյան | 14 | – | 1 |
| 13. Իվան Սանտյագո Դիազ | 14 | – | – |
| 14. Հովհաննես Նազարյան | 11 | 1 | 1 |
| 15. Մարկո Պրլևիչ | 11 | – | 2 |
| 16. Ռազմիկ Հակոբյան | 8 | – | 1 |
| 17. Ռուդիկ Մկրտչյան | 8 | – | 2 |
| 18. Ռոբերտ Դարբինյան | 8 | – | 1 |
| 19. Իգոր Ստանոևիչ | 4 | 1 | – |
| 20. Ռոբերտ Հակոբյան | 4 | – | – |
| 21. Էրիկ Վարդանյան | 1 | – | – |
| 22. Ամարա Տրաորե | 1 | – | – |
