Ռիո 2016-ը ավարտվեց: Տաք, կրքոտ բրազիլական ու կանաչ Օլիմպիական խաղերն արդեն անցնում է պատմության գիրկը: Շուրջ 10.500 մարզիկ ամբողջ աշխարհից եկան ու մասնակցեցին, գրեցին իրենց պատմությունը: Նրանց թվում էին 33 հայ մարզիկ միայն Հայաստանից, բայց սրանով հայկական մասնակցությունը չսահմանափակվեց : Եվս 15 մարզիկ պարզապես այլ երկրների կազմից հանդես եկան: Նրանք բոլորն էլ արդեն ավարտել են իրենց ելույթները, մի քանիսն էլ նվաճել Օլիմպոսը:
Դավիթ Գրաֆ. (բռնցքամարտ (91կգ)/ Գերմանիա)
Միանգամից 3 հայ բռնցքամարտիկ հանդես էր գալիս Գերմանիայի բռնցքամարտի օլիմպիական հավաքականում: Դավիթ Գրաֆը նույնպես: Նրա իսկական անունը Վահագն Սահակյան է: 91կգ քաշային կարգում Գերմանիան ներկայացնում էր հենց նա:
Ծնվել է Երևանում 1989թ. հունվարի 12-ին: Այստեղ էլ մեծացել է, պատանեկան տարիներն արդեն անց է կացրել Գերմանիայում: Դավիթ Գրաֆ մականունը ձեռք է բերել 2011թ. երբ Գերմանիայի Զինդելֆինգեր քաղաքում մտնում է պրոֆեսիոնալ բռնցքամարտ: Այս փոփոխությունը պայմանավորված է ավելի հիշվող և հեշտ արտաբերվող անուն ունենալու ցանկությամբ: Ինչպես ինքն է նշում, Դավիթ անվան ընտրությունը կապ ունի նաև Սասունցի Դավիթ էպոսի հետ:
Մուտքը պրոֆեսիոնալ ռինգ վստահ ու աղմկահարույց էր: Առաջին 40 վայրկյանների ընթացքում տապալեց մրցակցին: Դավիթ Գրաֆի կարիերայի ամենամեծ ձեռքբերումը 2007թ.-ին Եվրոպայի առաջնությունում նվաճած բրոնզե մեդալն է: Դրա հետ մեկտեղ 3 անգամ եղել է Գերմանիայի չեմպիոն: Պրոֆեսիոնալ ռինգում 11 մենամարտից 10-ը ավարտել է հաղթանակով, որից 7-ը նոկաուտով:
Մենամարտից առաջ Վահագնը մեկուսանում և կենտրոնացնում է ամբողջ ուժերը ռինգ դուրս գալու և հաղթանակ տանելու համար: Վահագնի նպատակներից մեկն է հասնել, անգամ գերազանցել Մուհամեդ Ալիին:
Ռիոյում 1/8 փուլում Վահագնը 2:1 հաշվով զիջեց Արգենտինայի ներկայացուցիչ Յամիլ Պեռալտային:
