«Փյունիկի» գլխավոր մարզիչ Արտակ Օսեյանը Հայաստանի գավաթի խաղարկության եզրափակչում «Շիրակից» կրած պարտությունից հետո (0-3) կայացած մամուլի ասուլիսում ասել է հետևյալը.
-Շատ բան չկա ասելու: Երևի, սա այս մրցաշրջանում մեր ամենաչստացված հանդիպումն էր: Ամենակարևոր խաղն էր, բայց՝ ամենաանհաջողը:
Որո՞նք էին պատճառները:
-Կարծում եմ՝ պատճառն ավելի շատ հոգեբանական է: Ճիշտ է, հիմա էմոցիոնալ վիճակը թույլ չի տալիս ավելի սառը գլխով դատել, բայց ամեն ինչ նրան է գնում, որ պարտության պատճառը հոգեբանական էր: Երևի դեռ այդքան շատ չենք հասունացել, որ այսպիսի կարևոր խաղերում ավելի սառնասիրտ լինենք:
Մրցակիցն իր առաջին երկու գոլերը խփեց հեռահար փոխանցումներից հետո: Չէ՞իք սպասում նմանատիպ մարտավարության:
-Դա անսպասելի չէր: Մենք «Շիրակին» լավ էինք ուսումնասիրել, նրանց դեմ շատ ենք խաղացել: Բայց ստացվեց այնպես, ինչպես ստացվեց:
Անհատական սխալները կապված էին հոգեբանության հե՞տ:
-Բնական է, խաղի լարվածությունը մեծ էր, բայց միայն կապված չէր հոգեբանության հետ: Արթուր Քարտաշյանը գոլի դրվագում սայթաքեց և ընկավ, դա բոլորի հետ էլ կարող է պատահել: Հիմա գնահատական տալը մի փոքր դժվար է:
Առաջնության վերջին խաղում դաշտ էիք մտցրել հիմնական կազմը: Թիմի մոտ կուտակված հոգնածությունն այսօր զգացնել տվե՞ց:
-Գիտեք՝ եթե մենք գոլերը բաց թողնեինք խաղավերջում, ապա կհամաձայնեի: Բայց եթե թիմն արդեն 35-րդ րոպեին երեք գոլ է բաց թողել, դա արդեն հոգնածության հետ կապված չէ:
Ի՞նչ ասացիք թիմին հանդերձարանում ընդմիջմանը:
-Թիմին ասացի՝ «Կամ դաշտ ենք դուրս գալիս հանձնված, կամ պայքարում ենք մեր անվան համար»: Այդքան բան:
Երկրորդ կեսում ցուցադրած խաղից գո՞հ եք:
-Ոչ, այսօր ընդհանուր խաղից գոհ չեմ:
