Կանադայի և Ավստրալիայի իշխանությունները հայտնել են բնակչության շրջանում կապիկների ջրծաղկի առաջին դեպքերի մասին:
«Նոր Հարավային Ուելսի առողջապահության վարչությունը հայտնաբերել է կապիկի ջրծաղկի հավանական դեպք Եվրոպայից վերջերս վերադարձած ճանապարհորդի մոտ», - ասվում է ավստրալական նահանգի վարչության պաշտոնական կայքում:
Հստակեցվում է, որ խոսքը քառասնամյա տղամարդու մասին է, որն ուղևորությունից մի քանի օր անց դիմել է հիվանդանոց։
Կանադայում առաջին վարակվածը հայտնաբերվել է Քվեբեկում.
«Այսօր երեկոյան (հինգշաբթի) Քվեբեկ նահանգը ծանուցվել է, որ Ազգային մանրէաբանական լաբորատորիայից ստացված՝ կապիկի ջրծաղկի ստուգման երկու նմուշների թեստերը դրական են եղել: Սրանք Կանադայում հաստատված առաջին դեպքերն են»,- հայտնում է Կանադայի կառավարության կայքը:
Վարակվածներից մեկը երկիր ժամանած ԱՄՆ քաղաքացի է։
Ավելի վաղ Մեծ Բրիտանիայի Առողջապահության գործակալությունը (UKHSA) հայտնել էր, որ երկրում կապիկների ջրծաղկով հիվանդների ընդհանուր թիվը հասել է 9-ի։ Իսպանիայի առողջապահության նախարարությունը և տեղական իշխանությունները սանիտարահիգիենիկ տագնապ են հայտարարել Մադրիդում վարակի ութ դեպքից հետո, հայտնում են տեղական լրատվամիջոցները։ Շվեդիային զուգահեռ հիվանդության առաջին դեպքը գրանցվել է նաև Իտալիայում։
Կապիկի ջրծաղիկը հազվադեպ վիրուսային վարակ է, որը կարող է փոխանցվել նաև մարդկանց: Սովորաբար, դա թեթև հիվանդություն է, և մարդկանց մեծամասնությունն առողջանում է մի քանի շաբաթից, սակայն ոմանց մոտ կարող են բարդություններ առաջանալ:
Առողջապահության գործակալությունը նշել է, որ կապիկի ջրծաղիկը չի համարվում սեռական ճանապարհով փոխանցվող վարակ, բայց կարող է փոխանցվել վարակված մարդու հետ սերտ շփման միջոցով։
Կապիկի ջրծաղկի սկզբնական ախտանշաններն են՝ ջերմություն, գլխացավ, մկանային ցավ, մեջքի ցավ, այտուցված ավշային հանգույցներ, դող և հյուծվածություն: Կարող է առաջանալ ցան, որը հաճախ սկսվում է դեմքի վրա, այնուհետև տարածվում մարմնի այլ մասերում։ Այն փոփոխվում է և անցնում տարբեր փուլեր։