«Բարսելոնան» հետաքրքրված է «Ռեալ Սոսյեդադի» հարձակվող Ալեքսանդր Իսակի ծառայություններով: Այս մասին հաղորդում է Mundo Deportivo-ն:
Ըստ տեղեկությունների՝ կատալոնական ակումբը շվեդ ֆուտբոլիստի թեկնածությունը դիտարկում է որպես այլընտրանքային տարբերակ այն սցենարի համար, եթե չհաջողվի գնել «Ինտերի» հարձակվող Լաուտարո Մարտինեսի տրանսֆերը, ինչի դիմաց պահանջվող գումարը կարող է խնդիր հանդիսանալ գործարքի կայացման շրջանակում:
Իսակի՝ պայմանագրով նախատեսված հրաժարագինը կազմում է 70 մլն եվրո, սակայն նրա նախկին ակումբ Դորտմունդի «Բորուսիան» ունի նրան մինչև 2022 թվականը 30 մլն եվրոյի դիմաց վերադարձնելու առաջնահերթ իրավունք:
Հարձակվողը 2019 թվականի ամռանն է 6,5 մլն եվրոյի դիմաց միացել «Ռեալ Սոսյեդադին»: 20-ամյա ֆուտբոլիստն Իսպանիայի Լա Լիգայի ընթացիկ առաջնությունում մասնակցել է 27 խաղի (9-ը՝ մեկնարկային կազմում) և դարձել 7 գոլի ու 1 արդյունավետ փոխանցման հեղինակ: Իսակի պայմանագրի ժամկետը բասկյան ակումբի հետ ուժի մեջ է մինչև 2024 թվականի ամառ:
«Ինտերը» միայն մեկ դեպքում կվաճառի Լաուտարո Մարտինեսին
