Ֆրանսիայի ֆուտբոլի ֆեդերացիայի բողոքարկման հանձնաժողովն ուժի մեջ է թողել «Բորդո» ակումբը երկրի առաջնության 3-րդ դիվիզիոն տեղափոխելու մասին որոշումը։
Ֆինանսական ստուգմամբ՝ ակումբում հայտնաբերվել էին խախտումներ, որոնց պատճառով հունիսի 14-ին որոշվել էր պատժամիջոց կիրառել։ Սակայն «Բորդոյի» ղեկավարությունը, չհամաձայնելով ֆեդերացիայի որոշմանը, բողոքարկել էր այն։ Բողոքարկումը մերժվել է, բայց ակումբի նախագահ Ժերար Լոպեսը մտադիր է շարունակել պայքարը։
RMC Sport-ի տեղեկություններով՝ եթե Լոպեսը չհասնի հաջողության, ապա «Բորդոն» կարող է դիմել՝ սնանկ ճանաչվելու համար։ Այդ դեպքում թիմը գալիք մրցաշրջանը կսկսի արդեն ոչ թե 3-րդ, այլ 5-րդ դիվիզիոնում։
2021/22 մրցաշրջանում «Բորդոն» վերջին տեղն էր գրավել Լիգա 1-ում և դուրս է մնացել ֆրանսիական ֆուտբոլի էլիտար խմբից։
