Ուկրաինայի հավաքականը, նախապատրաստվելով ԱԱ 2022-ի որակավորման փլեյ-օֆֆ փուլի կիսաեզրափակիչին և Ազգերի լիգայի խմբային փուլի հանդիպումներին, ուսումնամարզական հավաք է սկսել, որի ընթացքում կանցկացնի մի քանի հանդիպում՝ տեղեկացնում է այդ երկրի ֆուտբոլի ֆեդերացիայի մամուլի ծառայությունը:
Այսօր Ալեքսանդր Պետրակովի գլխավորած ընտրանին Գերմանիայում՝ «Բորուսիա Պարկ» ստադիոնում, կմրցի Մյոնխենգլադբախի «Բորուսիայի» հետ (մեկնարկը՝ 22:45-ին):
Հիշեցնենք՝ ուկրաինացիները մարտին չեն կարողացել անցկացնել ԱԱ 2022-ի որակավորման փլեյ-օֆֆ փուլի կիսաեզրափակիչի՝ Շոտլանդիայի դեմ հանդիպումը (այս խաղը կկայանա հունիսի 1-ին) Ռուսաստանի՝ Ուկրաինայում սկսած ռազմական հատուկ գործողության պատճառով, որը մինչև այժմ շարունակվում է:
Պետրակովի թիմն առաջիկա տնային հանդիպումները կանցկացնի Լեհաստանում, այդ թվում՝ Հայաստանի հավաքականի դեմ Ազգերի լիգայի շրջանակում նախատեսված մրցավեճը (հունիսի 11):