Բարեղամ Հարությունյանը (48 կգ) Սերբիայի մայրաքաղաք Բելգրադում ավարտին մոտեցող բռնցքամարտի Եվրոպայի առաջնությունում դուրս եկավ եզրափակիչ:
Հայ բռնցքամարտիկը կիսաեզրափակիչում 4-1 հաշվով հաղթեց սերբ Ռադե Յոքսիմովիչին: Երեք ռաունդներում էլ 35-ամյա Հարությունյանն ուներ առավելություն:
Հայաստանի ներկայացուցիչը քառորդ եզրափակիչում պայքարից դուրս էր թողել Եվրոպայի գործող չեմպիոնին:
Հարությունյանը եզրափակիչում կմենամարտի Ռուսաստանը ներկայացնող հայ բռնցքամարտիկ Էդմոնդ Խուդոյանի հետ: Այս քաշային կարգի եզրափակիչը տեղի կունենա ապրիլի 28-ին:
Ավելի վաղ կանանց Հայաստանի հավաքականի անդամներ Անուշ Գրիգորյանը (50 կգ) և Անի Հովսեփյանը (70 կգ) պարտվել էին կիսաեզրափակիչի մենամարտերում և բավարարվել բրոնզե մեդալով:
Հիշեցնենք, որ քիչ անց տղամարդկանց պայքարում կփորձեն եզրափակիչ դուրս գալ նաև Արթուր Բազեյանը (57 կգ), Արթուր Սահակյանը (60 կգ), Արարատ Հարությունյանը (67 կգ) և Նարեկ Մանասյանը (92 կգ):
Ֆոտո՝ ՀԲՖ մամուլի ծառայություն