Մայրաքաղաքի «Անի Գրանդ» հյուրանոցում տեղի ունեցած վիճակահանությամբ որոշվել են բռնցքամարտի Եվրոպայի առաջնությունում Հայաստանի մարզիկների առաջին մրցակիցները։
Մերոնցից առաջինը ռինգ է դուրս գալու 75 կգ քաշային Վախթանգ Հարությունյանը, որն այսօրվա երեկոյան մրցահերթում 1/16 եզրափակիչում հանդիպելու է լեհ Բարտոշ Գոլեբիեվսկիին։ Վաղը՝ ցերեկը, պայքարի մեջ կմտնեն Ջանիկ Սահակյանը (54 կգ, 1/8 եզրափակիչ) և Նարեկ Զախարյանը (71 կգ, 1/16 եզրափակիչ), որոնք կմրցեն համապատասխանաբար Ուկրաինան ներկայացնող Ելմիր Նաբիևի ու սլովակ Միխալ Թաքակսի հետ։ Երեկոյան Համբարձում Հակոբյանը (80 կգ) 1/8 եզրափակիչում կպայքարի մոլդովացի Դմիտրի Կոսցյուկի հետ։
Մայիսի 25-ի ցերեկը Ռաֆայել Հովհաննիսյանը (86 կգ) 1/8 եզրափակիչում հանդիպելու է բուլղարացի Կրիստիան Դիմիտրով-Ստեֆանովին, իսկ երեկոյան Կարեն Տոնականյանը (60 կգ) նույն փուլում մրցելու է հունգարացի Ռոլանդ Վերեշի հետ։
Մայիսի 26-ի ցերեկը Հովհաննես Բաչկովը (63,5 կգ), Գուրգեն Մադոյանը (67 կգ) և Դավիթ Չալոյանը (92 կգ-ից բարձր) 1/8 եզրափակիչի մենամարտեր են անցկացնելու։ Բաչկովը մրցելու է Ջոզեֆ Թայերս (Անգլիա) - Կիլիան Բրենդան Մակքարթի (Իռլանդիա) զույգի հաղթողի հետ, Մադոյանի մրցակիցն է լինելու ֆինն Բենջամին Կարլ Էրիկսոնը, իսկ Չալոյանինը՝ Յուրայ Սոլիդա (Բոսնիա-Հերցեգովինա) - Ալգիրդաս Բանիուլիս (Լիվտա) զույգի հաղթողը։ Երեկոյան նույն փուլում Նարեկ Մանասյանը (92 կգ) մրցելու է սլովակ Դավիդ Միխալեկի հետ։
Մայիսի 27-ի ցերեկն առաջնությունում կմեկնարկեն Բարեղամ Հարությունյանը (48 կգ) և Արթուր Հովհաննիսյանը (51 կգ)։ Նրանցից առաջինը հանդիպելու է Վրաստանը ներկայացնող Սախիլ Ալախվերդովին, իսկ երկրորդը՝ Աթիլլա Բերնաթ (Հունգարիա) - Մարտին Սալվադոր Մոլինա (Իսպանիա) զույգի հաղթողին։ Երեկոյան Արթուր Բազեյանը (57 կգ) մրցելու է Ալեն Ռահիմիչ (Բոսնիա և Հերցեգովինա) - Բաթուհան Չիտֆչի (Թուրքիա) զույգի հաղթողին։ Բոլոր երեքն էլ անցկացնելու են քառորդ եզրափակիչ փուլի մենամարտեր, ինչը ենթադրում է, որ հաղթելու դեպքում միանգամից ապահովելու են բրոնզե մեդալ։