«Ռեալ Սոսյեդադի» դեմ մրցավեճում Սերխիո Բուսկետսը 675-րդ անգամ է խաղադաշտ դուրս եկել «Բարսելոնայի» մարզազգեստով՝ հաշվի առնելով բոլոր մրցաշարերում ելույթները՝ հայտնում է Yahoo Sports-ը։
Այս ցուցանիշով Սերխիոն շրջանցել է Անդրես Ինիեստային (674), առջևում են միայն թիմի ներկայիս գլխավոր մարզիչ Չավին (767) և Լիոնել Մեսին (778), որն անցյալ ամռանն ազատ գործակալի կարգավիճակով միացել է ՊՍԺ-ին:
Անդրես Ինիեստան 2018 թվականի հուլիսին կատալոնական գրանդից տեղափոխվել է ճապոնական «Վիսել Կոբե» և մինչև այժմ ելույթ է ունենում այնտեղ:
33-ամյա Բուսկետսը «Բարսելոնայի» գլխավոր թիմում խաղում է 2008 թվականի հուլիսից:
Լա լիգայի ընթացիկ մրցաշրջանում «Բարսելոնան» 32 խաղից 63 միավորով զբաղեցնում է մրցաշարային աղյուսակի 2-րդ հորիզոնականը:
