«Բավարիայի» պաշտպան Ժերոմ Բոատենգը ընթացիկ մրցաշրջանի ավարտից հետո կհեռանա մյունխենյան թիմից, գրում է Kicker-ը։
Աղբյուրի փոխանցմամբ՝ «Բավարիայի» ղեկավարությունը որոշել է նոր պայմանագիր չառաջարկել 32-ամյա խաղացողին։ Այս մասին արդեն հայտնել են Բոատենգի ներկայացուցիչներին։ Ամռանը նա կդառնա ազատ գործակալ։
Բոատենգից բացի այս մրցաշրջանից հետո «Բավարիայից» հեռանալու է նաև Դավիդ Ալաբան։ Ակնհայտ է, որ Գերմանիայի չեմպիոնը փոփոխություններ է կատարում պաշտպանությունում։ Մյունխենյան թիմն արդեն պայմանագիր է կնքել «ՌԲ Լայպցիգի» 22-ամյա պաշտպան Դայո Ուպամեկանոյի հետ, որն ընթացիկ մրցաշրջանից հետո միանալու է «Բավարիային»։
Ժերոմ Բոատենգը «Բավարիայում» հանդես է գալիս 10 տարի։ Նա թիմի հետ 8 անգամ դարձել է Բունդեսլիգայի չեմպիոն, 5-ական անգամ հաղթել է Գերմանիայի գավաթում և սուպերգավաթում, 2-ական անգամ էլ հաղթել է Չեմպիոնների լիգայում, ՈՒԵՖԱ-ի սուպերգավաթում և Աշխարհի ակումբային առաջնությունում։