Ծանրամարտի եվրոպական ֆեդերացիան Հայաստանին է վստահել Հին աշխարհամասի հաջորդ տարվա առաջնության կազմակերպումը։ Միջազգային միջոցառումների օրացույցում արդեն նշված է, որ ստուգատեսն ընդունելու է Երևանը։ Ուրախալի լուրը VNews-ի հետ զրույցում հաստատեց մարզաձևի հանրապետական ֆեդերացիայի գլխավոր քարտուղար և Հայաստանի տղամարդկանց ազգային հավաքականի գլխավոր մարզիչ Փաշիկ Ալավերդյանը։
Նա նշեց, որ եվրոպական կառույցն արդեն որոշման մասին տեղեկացրել է հայկական կողմին։ «Իրականում այդ որոշումը, ուրախալի լինելով հանդերձ, նաև որոշակի մտահոգություն է առաջացնում, քանզի պետք է հասցնենք կարճ ժամանակահատվածում ենթակառուցվածքների խնդիր լուծել։
Անհրաժեշտ է բավարար քանակությամբ մարզումային դահլիճներ և տարածքներ պատրաստել Եվրոպայի առաջնության մասնակիցների համար, նաև նոր մրցահարթակներ և մարզագույք ձեռք բերել։ Մեծ ծավալի աշխատանք կա կատարելու»,- VNews-ին հայտնեց Փաշիկ Ալավերդյանը։
Այս տարվա մայիսին Երևանում է անցկացվելու նաև բռնցքամարտի Եվրոպայի առաջնությունը։
