Logo
ՍՊՈՐՏ / Ծանրամարտ
Հեղինակ

Հրայր Նազարյան

16:27 / 01.06.2022Ծանրամարտ
Հայ  ծանրամարտիկներ-ԵԱ

Ծանրամարտի ԵԱ. այսօր ունենք երկու մասնակից, Հայաստանի մյուս մարզիկների ելույթների մանրամասն ժամանակացույցը

Ալբանիայում ընթացող ծանրամարտի Եվրոպայի առաջնությունում այսօր մրցահարթակ են դուրս գալու Հայաստանի տղամարդկանց ազգային հավաքականի առաջին մարզիկները։

Երևանի ժամանակով 22:00-ից սկսած՝ նրանք ներգրավվելու են մինչև 81 կգ քաշային կարգի Ա խմբի մասնակիցների պայքարին։ Ասպարեզ դուրս կգան աշխարհի երիտասարդական առաջնության բրոնզե մրցանակակիր, մինչև 23 տարեկան մարզիկների Եվրոպայի չեմպիոն գյումրեցի Ռաֆիկ Հարությունյանը և երիտասարդների աշխարհի առաջնության արծաթե մեդալակիր, մինչև 20 տարեկանների Եվրոպայի եռակի չեմպիոն էջմիածնեցի Կարեն Մարգարյանը։

Երկամարտի նրանց նախնական հայտում նշված է 355 կգ արդյունք, որը երկրորդ ցուցանիշն է մոլդովացի Մարին Ռոբուի հայտից հետո։ Դա նշանակում է, որ մեր ծանրորդները տրամադրված են միջամտելու մեդալների համար պայքարին։  

Հիշեցնենք, որ եվրոպական այս ստուգատեսում Հայաստանի ներկայացուցիչներից առաջինը մեկնարկել է երևանցի Իզաբելա Յայլյանը, որը երկամարտի 197 կգ արդյունքով (պոկում՝ 90, հրում՝ 107 կգ) 5-րդ տեղն է գրավել 55 կգ քաշային կարգում։

Մեր երկրից առաջնությանը մասնակցում է 10 մարզիկ և 3 մարզուհի, որոնք ելույթ են ունենալու ներկայացվող հաջորդականությամբ.

հունիսի 2-ին՝ ժամը 19-ից՝ Անդրանիկ Կարապետյան, Վարդան Մանուկյան (երկուսն էլ՝ 89 կգ քաշային կարգ), ժամը 22-ից՝ Տաթև Հակոբյան (76 կգ)

հունիսի 3-ին՝ 22։00-ից՝ Դավիթ Հովհաննիսյան, Արա Աղանյան (երկուսն էլ՝ 96 կգ)

հունիսի 4-ին՝ 16:00-ից՝ Սամվել Գասպարյան (102 կգ), 19:00-ից՝ Արսեն Մարտիրոսյան (109 կգ), 22։00-ից՝ Հռիփսիմե Խուրշուդյան (87 կգ)

հունիսի 5-ին՝ 18։00-ից՝ Գոռ Մինասյան և Վարազդատ Լալայան (109 կգ-ից բարձր)։

Լրահոս