Եվրոպական թոփ ակումբում խաղալը՝ խաղ ու պար չէ: Բացի խաղային բարձր մակարդակից՝ անհրաժեշտ է նաև լավ ֆուտբոլային գործակալ, տրանսֆերի պատրաստ ակումբ, «անհավատարմություն» քո ակումբին: Շարքը երկար է, պատճառները՝ բազմազան: Ֆուտբոլում էլ նրանց մասին կասեին՝ «հայի բախտ» ունի: Նրանք լավագույններից են, բայց դեռ չեն հայտնվել թոփ ակումբներում, նրանց խաղամակարդակը բարձր է, բայց հաջողության գործոնը ցածր: VNews.am-ն ուսումնասիրել է լավագույնների ճակատագրերը, որոնք դեռ չեն խաղացել լավագույնների կազմում:
Նաբիլ Ֆեկիր («Բետիս», 27 տարեկան)
2018 թվականի հունիսին բոլորը սպասում էին թոփ տրանսֆերի գրանցմանը: «Լիվերպուլը» վերջապես փոխարինող էր գտել իր նախկին առաջատար Ֆիլիպե Կոուտինյոյին, որը հունվարին տեղափոխվել էր «Բարսելոնա»: Կատալոնացիներից ստացած հսկայական գումարից 70 միլիոնը (հնարավոր պարգևավճարներով) նրանք հատկացրել էին Ֆեկիրի տրանսֆերի համար, որը ֆանտաստիկ էր անցկացրել 2017/18 մրցաշրջանը (23 գոլ և 8 գոլային փոխանցում): «Կարմիրների» յութուբյան ալիքը նույնիսկ հասցրել էր 5-րոպեանոց հարցազրույց նկարահանել հարձակվողական ոճի կիսապաշտպանի հետ: Բայց ամեն ինչ խափանվեց, երբ «Լիվերպուլի» բժիշկները բուժզննման ժամանակ խնդիրներ գտան Ֆեկիրի ծնկի հատվածում: Նա կարող էր շարունակել խաղալ, սակայն լուրջ վնասվածքի հնարավորությունը չափազանց մեծ էր, այդ պատճառով գործարքը չկայացավ:
«Իմ ծնկի հետ ամեն ինչ կարգին է: Միայն «Լիվերպուլը» գիտի, թե ինչու տրանսֆերը խափանվեց»,- ավելի ուշ ասաց ալժիրյան արմատներով ֆուտբոլիստը:
Եվս մեկ տարի «Լիոնում» անցկացնելուց հետո ֆրանսիացին կրկին տարօրինակ իրադարձության կենտրոնում հայտնվեց: Նա տեղափոխվեց իսպանական «Բետիս»:
«Բետիսը» կարող է անհասկանալի ընտրություն թվալ, բայց ինձ դուր են գալիս խելահեղ մարտահրավերները»,- խոստովանեց ԱԱ-2018-ի չեմպիոնը:
Այս պահին «Լիվերպուլի» բժիշկների մտավախությունը չի արդարացել: Ֆեկիրը մասնակցում է գրեթե բոլոր խաղերին, լուրջ վնասվածք չի ստացել, մշտապես ընդգրկված է Եվրոպայի լավագույն խաբքեր կատարողների թվում: Այս պահին Նաբիլը ֆանտաստիկ մարզավիճակում է: 2021 թվականը նա այնքան փայլուն է սկսել, որ հունվար-մարտ ամիսներին մարզական հետազոտությունների միջազգային կենտրոնի (CIES) հաշվարկով Եվրոպայի լավագույն 7 ֆուտբոլիստներից մեկն է ճանաչվել:
Տարբեր տեղեկությունների համաձայն`Ֆեկիրի ծառայություններով հետաքրքրված են «Արսենալն» ու «Միլանը»: Սակայն ֆուտբոլիստը հայտարարել է, որ ցանկանում է խաղալ «Բարսելոնայում» կամ «Ռեալում»: Իսպանական գրանդների դեմ խաղերում Ֆեկիրն արդեն ապացուցել է, որ այդ թիմերում խաղալու համար ունի բավարար խաղամակարդակ:
Մեր ընտրանին
-
Երբ առաջինը Ռոնալդուն չէ. 21-րդ դարում «Ռեալի» լավագույն 10 տրանսֆերները
-
«Cherchez la femme». ինչպես են կանայք ազդել ֆուտբոլի պատմության կարևորագույն տրանսֆերների վրա
-
#Here we go. Ով է Ֆաբրիցիո Ռոմանոն, որը գիտի ամեն ինչ տրանսֆերների մասին
Ջեք Գրիլիշ («Ասթոն Վիլա», 25 տարեկան)
Եթե այժմ Գրիլիշն Անգլիայում հայտնի է որպես ֆուտբոլիստ, որից անհնար է գնդակ խլել, ապա 5 տարի առաջ նրա մասին ավելի շատ խոսում էին որպես սկանդալային կերպար: Երբ Ջեքը երիտասարդ էր հիասթափեցրեց բազմաթիվ իռլանդացիների և որոշեց խաղալ Անգլիայի հավաքականի կազմում, «առյուծների» երկրպագուները նույնպես շատ չուրախացան, նրանց հարկավոր չէր ևս մեկ փլեյբոյ: Այդ ժամանակ Գրիլիշը սկանդալներում ավելի հաճախ էր հայտնվում, քան մրցակցի տուգանային հրապարակում: 2015 թվականի ամռանն համացանցում տարածվեց Գրիլիշի լուսանկարները Տեներիֆեում, որտեղ երեկույթներից մեկից հետո նա հարբած և քնած էր փողոցում:
Մի քանի ամիս անց, երբ նրա հարազատ «Ասթոն Վիլան» 0:4 հաշվով պարտվեց «Էվերթոնին», Գրիլիշը որոշեց, որ պարտությունը մոռանալու լավագույն միջոցը գիշերային ակումբներից մեկում հարբելն է, ինչի պատճառով հեռացվեց գլխավոր թիմից:
Միայն դրանից հետո անգլիացին «խելքի եկավ» և սկսեց կառավարել իրեն: Հիմա նա «Ասթոն Վիլայի» բացահայտ առաջատարն է, հրավիրվում է Անգլիայի ազգային հավաքական և նախկինի պես մրցակցի պաշտպանների սարսափն է: Այժմ Գրիլիշի մասնակցությամբ սկանդալները միայն ֆենտզի ֆուտբոլին են վերաբերում:
«Մանչեսթեր Յունայթեդը» վաղուց է երազում Գրիլիշի տրանսֆերի մասին.
«Ինձ չի հետաքրքրում Պոգբան կմնա «Յունայթեդում», թե` կհեռանա: Մեզ Գրիլիշն է հարկավոր»,- հունվարին ասել է ՄՅՈւ-ի նախկին ավագ Ռիո Ֆերդինանդը:
Վերջերս Գրիլիշը բոլորի համար անսպասելիորեն նոր` երկարաժամկետ պայմանագիր կնքեց «Ասթոն Վիլայի» հետ: Չի բացառվում, որ նա ցանկանում է կարիերան անցկացնել հարազատ ակումբում , որի կազմում նա խաղում է 6 տարեկանից: Դա շատ գեղեցիկ պատմություն կլինի:
Այդուհանդերձ, Պրեմիեր լիգայի այլ գրանդներ նույնպես հետաքրքրված են Ջեքի ծառայություններով, սակայն ֆավորիտը մնալու է «Մանչեսթեր Յունայթեդը», որովհետև այդ ակումբում է խաղացել Գրիլիշի կուռքը` Ջորջ Բեսթը, որի խաղը նա տեսել է միայն վավերագրական ֆիլմում:
Մարսել Զաբիտցեր («ՌԲ Լայպցիգ», 27 տարեկան)
Կասկած չկա, որ «ՌԲ Լայպցիգը» թոփ ակումբ դառնալու ճանապարհին է: Ընդամենը 12 տարվա պատմություն ունեցող ակումբը հասցրել է Գերմանիայի հինգերորրդ դիվիզիոնից հասնել Բունդեսլիգա, անմիջապես երկրորդ տեղը գրավել, ամրապնդել իր դիրքերը, իսկ վերջին տարիներին հայտնվել եռյակում: «Ռեդ Բուլի» ստեղծած սկաուտային և կազմակերպչական համակարգը թույլ է տալու անկախ անձանցից, գրեթե միշտ լինել ուժեղագույնների թվում: Այդուհանդերձ, քանի դեռ «ցլերը» չեն սկսել տիտղոսներ նվաճել, նրանք լիարժեք թոփ ակումբ չեն համարվի: Այդ պատճառով նրանց առաջատարները հեռանում են: Այս անգամ նույնիսկ գլխավոր մարզիչն է տեղափոխվում «Բավարիա»` ակումբ, որի դեմ նրանք պայքարում են:
Մեծ է հավանականությունը, որ մյուս նշանակալի կորուստը դառնալու է թիմի ավագ Մարսել Զաբիտցերը: Ավստրիացու պայմանագրի ժամկետը սպառվելու է մեկ տարուց: Մեկ ամիս առաջ հայտնի դարձավ, որ նա արդեն մերժել է նոր պայմանագրի առաջարկը և ակումբի ղեկավարությանը տեղեկացրել է հեռանալու մտադրության մասին: Bild-ի տեղեկությամբ` իրավիճակից փորձելու են օգտվել «Մանչեսթեր Յունայթեդը», «Լիվերպուլը» և «Տոտենհեմը»: Լոնդոնցիները մեկ տարի է՝ ֆավորիտ էին համարվում Զաբիտցերի համար պայքարում: Ավստրիացուն գովերգելու առիթը հատկապես բաց չէր թողնում Ժոզե Մոուրինյուն, բայց նա արդեն «Տոտենհեմում» չէ: Դա չի նշանակում, որ լոնդոնյան ակումբը տրանսֆերային իր ցանկում ջնջել է Մարսելի անունը:
Զաբիտցերը 6 տարի «Լայպցիգի» գլխավոր թիմում է խաղում և շատ արագ առաջադիմում է: Նախորդ մրցաշրջանը նա այնպիսի ֆանտաստիկ մակարդակով անցկացրեց, որ նույնիսկ ՈւԵՖԱ-ի որոշմամբ ընդգրկվեց Եվրոպայի լավագույն ֆուտբոլիստի թեկնածուների թվում: Ավստրիացու շքեղ գոլը «Զենիթի» դարպասին ճանաչվեց Չեմպիոնների լիգայի նախորդ խմբային փուլի լավագույնը:
Բունդեսլիգայի ընթացիկ խաղարկությունում Մարսելի վիճակագրությունը 24 խաղում՝ 7 գոլ ու 3 ասիստ է , սակայն չպետք է մոռանալ, որ նա կենտրոնական կիսապաշտպան է, որի պարտականությունը գրոհներ եզրափակելը չէ: Բոլոր մարզիչները Զաբիտցերի մասին խոսելիս նշում են նրա բազմակողմնակիությունը, մոբիլությունը և խաղային դիապազոնը, ինչի շնորհիվ նա համապատասխանում է ցանկացած խաղային սխեմային:
Եթե «Լայպցիգի» ավագը փոխի թիմը, նրա տրանսֆերի համար կվճարվի մոտ 50 մլն եվրո: Ավստրիացին հատկապես կհամապատասխանի «Լիվերպուլի» խաղին: Եթե Գերմանիայում չաշխատած Մոուրինյուն նկատել է Զաբիտցերի խաղամակարդակը, ապա կարելի է վստահ լինել, որ ավստրիացին վաղուց Յուրգեն Կլոպի տեսադաշտում է: Նա հենց այդպիսի ֆուտբոլիստների կարիք ունի:
Վիրավորված, բայց ոչ խոցված. Ֆուտբոլիստներ, որոնք վերադարձել են սոսկալի վնասվածքներից հետո