Եվրոպա, ՈւԵՖԱ Եվրոպայի առաջնություն, Եզրափակիչ Փուլ
03 Հուլիս 2021 - 20:00
Չեխիա
Դանիա
0 - 1 Թոմաս Դիլեյնի - 5`
0 - 2 Կասպեր Դոլբերգ - 42`
1 - 2 Պատրիկ Շիկ - 49`
Բաքվի «Օլիմպիական» ստադիոնում այսօր ԵՎՐՈ 2020-ի քառորդ եզրափակիչի շրջանակում կկայանա Չեխիա – Դանիա հանդիպումը:
Դանիայի ֆուտբոլային միությունը խաղին ընդառաջ հանդիպումն ընդունող երկիր Ադրբեջանում մարդու իրավունքների պաշտպանության, խոսքի ազատության, կանանց դերի ու քաղաքական իրավիճակի վերաբերյալ ճշտումներ է կատարել Դանիայում գործող Amnesty International կազմակերպությունից:
Դանիայի ֆուտբոլային միությունն այս ճշտումները կատարել է՝ երկրպագուներին հայտնելու, թե արդյոք նպատակահարմա՞ր է հավաքականի խաղը դիտելու համար Բաքու այցելելը, թե՞ ոչ:
«Ադրբեջանը խնդիրներ ունի մարդու հիմնարար իրավունքների պահպանման գործում: Հետևաբար մենք խորհրդատվություն ենք խնդրել Դանիայում գործող Amnesty International-ից: Մենք երախտապարտ ենք մեր երկրպագուներին, որ ցանկանում են ժամանել մեր խաղին, բայց մինչև որոշում կայացնելն առաջարկում ենք ծանոթանալ Ադրբեջանում տիրող իրավիճակին»,- Դանիայի ֆուտբոլային միությունը մեջբերում է գործադիր տնօրեն Յակոբ Յենսենի խոսքը:
«Ադրբեջանի կառավարությունը տարիներ շարունակ սպորտային միջոցառումների կազմակերպումն օգտագործել է՝ մարդու իրավունքների խախտումները քողարկելու համար, և ֆուտբոլի Եվրոպայի առաջնությունը բացառություն չէ: Ուստի մենք ուրախ ենք, որ Ադրբեջանում մարդու իրավունքների վերաբերյալ մեր տեղեկությունները կարող ենք փոխանցել Դանիայի ֆուտբոլային միությանը, ինչպես նաև երկրպագուներին, որոնք ցանկանում են մեկնել խաղին»,- ասել է Amnesty-ի քաղաքական խորհրդական Անետ Ստուբկյոր Ռիմերը:
Դանիայի ֆուտբոլային միությունն իր պաշտոնական կայքում հրապարակել է նաև Amnesty International-ի՝ Ադրբեջանի հանցագործությունների վերաբերյալ փաստաթուղթ:
Փաստաթուղթը բաղկացած է 5 կետից, որոնք վերաբերում են երկրում քննադատական խոսքի բացառմանը, քաղաքական հայացքներով պայմանավորված բանտարկություններին, ցույցեր կազմակերպելու վերաբերյալ իշխանությունների անհանդուրժողականությանը, մի շարք միջազգային հասարակական կազմակերպությունների դուրս մղմանը երկրից, խոշտանգումներին ու վատ վերաբերմունքին, պատերազմի ընթացքում և դրանից հետո տեղի ունեցած ռազմական հանցագործություններին:
Amnesty International-ը շեշտադրում է կատարել այն հանգամանքի վրա, որ Ադրբեջանի իշխանությունների հրամանով՝ բանտերում ցուցաբերվում է անմարդկային վերաբերմունք ինչպես քաղաքացիական անձանց նկատմամբ, այնպես էլ՝ ռազմագերիների՝ նրանցից տեղեկություն ստանալու կամ բանտարկյալներից իրենց ուզածը լսելու համար:
Կազմակերպությունը փաստել է նաև, որ պատերազմի ընթացքում Ադրբեջանը կատարել է մի շարք ռազմական հանցագործություններ: