Արգենտինայի հավաքականի նախկին գլխավոր մարզիչ, լեգենդար Դիեգո Մարադոնան քննադատել է «Ինտերի» հարձակվող Մաուրո Իկարդիին: Նա կոչ է արել ազգային ընտրանու մարզիչ Խորխե Սամպաոլիին հեռու պահել Իկարդիին հավաքականի ճամբարից ու նրան առհասարակ չհրավիրել հավաքական:
«Խորխե Սամպաոլին պետք է նայի իրականության աչքերին: Գոնսալո Հիգուայինին անկասկած, պետք է հնարավորություն տալ: Նա հազար անգամ ավելի լավն է, քան Իկարդին: Նա գերազանց կարողանում է միայն ընկերոջ կնոջ հետ անկողին մտնել», – հայտարարել է Մարադոնան TNT Sports LA-ի հետ զրույցում: Հիշեցնենք, որ Մաուրո Իկարդին մի քանի տարի առաջ հայտնվել է սկանդալի կենտրոնում, երբ հաստատվել է նրա սեռական կապը իր հայրենակից, հարձակվող Մաքսի Լոպեսի կնոջ հետ, ում հետ էլ Իկարդին հետագայում ամուսնացել է:
Հավելենք միայն, որ Իտալիայի այս տարվա առաջնությունում Իկարդին 18 գոլով երկրորդ լավագույն ռմբարկուն է՝ 2 գնդակ զիջելով միայն «Լացիոյի» հարձակվող Չիրո Իմոբիլեին: Գոնսալու Հիգուայինի ակտիվում 14 գնդակ է: