«Սևանի» պորտուգալացի 20-ամյա դարպասապահ Դիոգո Ֆիգերեդոն կամ պարզապես Դիդին իրապես դարձել է հոբելյանական առաջնության իսկական հայտնությունը: Հուսալի խաղով աչքի ընկնող Ֆիգերեդոն շարունակում է մնալ ընթացիկ առաջնությունում գոլ բաց չթողած միակ դարպասապահը:
Առաջնության 8-րդ տուրում էլ նա հաջողությամբ դիմագրավեց «Արարատ-Արմենիայի» գրոհներին, որն առաջնության նախորդ 7 հանդիպումներում 21 գոլ էր խփել: Սակայն Ֆիգերեդոյի դարպասը խոցել առաջատարին այդպես էլ չհաջողվեց:
Այսպիսով, արդեն 6-րդ անընդմեջ խաղում Դիոգո Ֆիգերեդոն սեփական դարպասն անառիկ պահեց: Այլ կերպ ասած, նա 540 րոպե շարունակ գոլ բաց չի թողել: «Սևանի» դարպասապահն ընդգրկվեց դարպասապահների խորհրդանշական «500-ի ակումբի» կազմում՝ միանգամից տեղ զբաղեցնելով 20-րդ հորիզոնականում:
«500-ի ակումբում» ընդգրկված են այն դարպասապահները, որոնց հաջողվել է ՀՀ առաջնություններում անցկացրած հանդիպումներում դարպասն անընդմեջ 500 և ավելի րոպե անառիկ պահել: Յուրօրինակ ռեկորդակիրը «Շիրակի» նախկին դարպասապահ Ռայմոնդ Զադուրյանն է, որը 2002թ. առաջնությունում դարպասն անընդմեջ 755 րոպե անառիկ է պահել:
Իհարկե, դժվար է գուշակել, թե արդյոք Ֆիգերեդոյին կհաջողվի՞ գերազանցել Զադուրյանի ռեկորդային ցուցանիշը: Դրա համար նրան անհրաժեշտ կլինի առաջնության առաջիկա 3 հանդիպումներում դարպասն անառիկ պահել առնվազն 216 րոպե շարունակ:
Ընթացիկ առաջնությունում պորտուգալացի դարպասապահն արդեն 2 ռեկորդային ցուցանիշ է գերազանցել, որոնց մասին տեղեկացրել ենք ֆուտբոլասերներին:
Հիշեցնենք, որ 20-ամյա Ֆիգերեդոն գերազանցել էր Անատոլի Այվազովի տարիքային ռեկորդը: Վերջինս 2016թ. 20 տարեկանում պաշտպանելով «Շիրակի» դարպասը, 259 րոպե շարունակ առաջնությունում գոլ բաց չէր թողել, ինչը լավագույն արդյունքն էր այդ տարիքի այլազգի դարպասապահների մեջ:
Շարունակելով անառիկ խաղերի շարքը, հետագայում Ֆիգերեդոն նոր ռեկորդ էր սահմանել ՀՀ առաջնություններում հանդես եկած 20-ամյա դարպասապահների մեջ՝ գերազանցելով «Փյունիկի» նախկին դարպասապահ Արսեն Պետրոսյանի ռեկորդային ցուցանիշը: Վերջինս 2011թ. առաջնությունում 20 տարեկանում դարպասը 405 րոպե շարունակ անառիկ էր պահել:
Դիոգո Ֆիգերեդոն «500-ի ակումբում» ընդգրկված 19-րդ դարպասապահն է: Այլազգի դարպասապահներից դարպասն անընդմեջ անառիկ պահած րոպեների քանակով առայժմ Ֆիգերեդոյին գերազանցում են միայն Օգնյեն Չանչարևիչն (594) ու Վսևոլոդ Երմակովը (566): «500-ի ակումբում» նրանց շրջանցելու համար Ֆիգերեդոյին բավարար է «Նոայի» հետ կայանալիք առաջիկա խաղում 55 րոպե դարպասն անառիկ պահել:
VNews.am-ը ներկայացնում է «500-ի ակումբում» ընդգրկված դարպասապահների ցուցանիշները:
Դարպասապահներ | Ակումբ | Րոպե | Ժամանակահատված |
1.Ռայմոնդ Զադուրյան | «Շիրակ» | 755 | 04.07.2002-30.09.2002 |
2.Ֆելիքս Հակոբյան | «Միկա» | 733 | 04.11.2007-12.06.2008 |
3.Էդիկ Երիցյան | «Արարատ», «Գանձասար» | 704 | 24.09.2006-19.05.2007 |
4.Արթուր Հովհաննիսյան | «Շիրակ» | 681 | 10.04.1992-25.05.1992 |
5.Արթուր Հովհաննիսյան | «Շիրակ» | 644 | 07.08.1997-26.09.1997 |
6.Գրիգոր Մելիքսեթյան | «Փյունիկ» | 600 | 19.11.2008-13.05.2009 |
7.Էդիկ Երիցյան | «Կոտայք» | 599 | 17.08.1996-29.09.1996 |
8.Արմեն Ավագյան | «Փյունիկ» | 595 | 15.08.1996-14.10.1996 |
9.Օգնեն Չանչարևիչ | «Ալաշկերտ» | 594 | 30.09.2018-28.11.2018 |
10.Գառնիկ Հովհաննիսյան | «Միկա» | 590 | 11.06.2005-18.07.2005 |
11.Նիկոլայ Սարգսյան | «Գանձասար», «Արարատ» | 585 | 15.10.2006-01.09.2007 |
12.Ստեփան Ղազարյան | «Արարատ» | 580 | 14.09.2013-09.11.2013 |
13.Գարեգին Նաջարյան | «Բանանց» | 576 | 09.04.1992-10.05.1992 |
14.Արսեն Բեգլարյան | «Գանձասար», «Ուլիս» | 568 | 18.05.2014-13.09.2014 |
15.Վսևոլոդ Երմակով | «Արարատ» | 566 | 27.11.2020-07.04.2021 |
16.Տիգրան Ասլանյան | «Էրեբունի» | 555 | 09.11.1998-26.07.1999 |
17.Հարություն Աբրահամյան | «Արարատ» | 553 | 17.10.1992-20.05.1993 |
18.Արթուր Ավագյան | ՀՄԸՄ | 552 | 05.11.1992-28.08.1993 |
19.Ֆելիքս Հակոբյան | «Միկա» | 541 | 22.06.2003-02.08.2003 |
20.Դիոգո Ֆիգերեդո | «Սևան» | 540 | 13.08.2021-29.09.2021 |
21.Արսեն Բեգլարյան | «Ալաշկերտ» | 536 | 04.03.2017-28.05.2017 |
22.Դմիտրի Աբակումով | «Արարատ-Արմենիա» | 533 | 01.09.2018-31.10.2018 |
23.Սաուլյուս Կլևինսկաս | «Միկա» | 532 | 02.04.2010-15.05.2010 |
24.Արմեն Հովհաննիսյան | «Կոտայք» | 530 | 17.03.1996-09.05.1996 |
25.Վլադիմիր Մալկով | «Ուլիս» | 530 | 17.04.2010-06.06.2010 |
26.Հարություն Աբրահամյան | «Երևան», «Արարատ» | 526 | 09.11.1998-07.04.1999 |
27.Արթուր Հովհաննիսյան | «Շիրակ» | 520 | 17.10.1998-19.05.1993 |
28.Արթուր Հովհաննիսյան | «Շիրակ» | 520 | 30.04.2000-13.06.2000 |
29.Գևորգ Կասպարով | «Ուլիս» | 507 | 25.10.2008-01.08.2009 |
30.Ստեփան Ղազարյան | «Արարատ» | 507 | 08.03.2014-19.04.2014 |