Նորվեգիայի հավաքականի կիսապաշտպան Մարտին Էդեգորը խոսել է ամառային տրանսֆերային պատուհանին Մադրիդի «Ռեալից» «Արսենալ» տեղափոխության մասին:
«Զգում եմ, որ ճիշտ ընտրություն եմ կատարել՝ հատկապես հաշվի առնելով այն, թե ինչպես էին իրադարձությունները «Ռեալում»: Ես ակումբի հետ պայմանագիր էի կնքել, երբ 16 տարեկան էի, ու առաջ նայելու ճիշտ ժամանակն էր:
Հավատացած էի, որ «Արսենալն» իդեալական ակումբ է ինձ համար»,- Marca-ն մեջբերում է նորվեգացու խոսքը:
Պրեմիեր լիգայի ընթացիկ մրցաշրջանում Էդեգորը մասնակցել է 16 խաղի՝ դառնալով 4 գոլի հեղինակ:
Հիշեցնենք, որ Հայաստանի ազգային հավաքականը 2022 թվականի մարտի 29-ին Օսլոյում ընկերական հանդիպում է անցկացնելու Մարտին Էդեգորի թիմի՝ Նորվեգիայի ընտրանու հետ: