Խառը մարտարվեստների ռուսաստանցի մարտիկ Էդուարդ Վարդանյանը նոր մրցակից կունենա ACA պրոմոութերական ընկերության հովանու ներքո անցկացվելիք թեթևքաշայինների «Գրան պրի» մրցաշարում՝ հայտնում է կազմակերպության մամուլի ծառայությունը։
Նշվում է, որ նրա մրցակից, UFC-ի նախկին մարտիկ, ամերիկացի Լուիս Պենյան (9 հաղթանակ, 3 պարտություն) միջազգային անձնագիր ստանալու վերաբերյալ բարդությունների պատճառով չի կարող մասնակցել մրցաշարին։
Այժմ Վարդանյանը (22 հաղթանակ, 4 պարտություն) պատրաստվում է մայիսի 21-ին նախատեսված ուժեղագույն ութնյակի ACA 139 մրցաշարին, որի մրցանակային հիմնադրամը 1 մլն դոլար է։ Մոսկվայում կայանալիք այդ մրցաշարի շրջանակում նրա նոր մրցակիցը կորոշվի առաջիկա օրերին։
Վերջին անգամ Վարդանյանը մենամարտել է անցյալ տարվա սեպտեմբերին, երբ Open FC 10 մրցաշարում առաջին ռաունդում տեխնիկական նոկաուտով հաղթել է բրազիլացի Ռայմունդո Բատիստին (13 հաղթանակ, 3 պարտություն)։