Իսպանիայի հավաքականի գլխավոր մարզիչ Լուիս Էնրիկեն տեղյակ չի եղել, որ իր թիմը Շվեյցարիայի ընտրանու հետ հանդիպման վերջնամասն անցկացրել է քանակական առավելությամբ:
Իսպանացիներն Ազգերի լիգայի գավաթի խաղարկության խմբային փուլի 5-րդ տուրում հյուրընկալվելիս ոչ-ոքի՝ 1-1 հաշվով են ավարտել Բազելում կայացած այդ մրցավեճը:
79-րդ րոպեին խաղադաշտից հեռացվել է շվեյցարացի պաշտպան Նիկո Էլվեդին:
Ինչպես հաղորդում է Marca-ն, Էնրիկեն, պատասխանելով լրագրողների հարցին այն մասին, որ իր թիմը խաղացել է քանակական առավելությամբ, շրջվել է աշխատակիցներից մեկի կողմն ու հարցրել․ «Ի՞նչ հեռացում»:
Ինչ վերաբերում է պաշտպան Սերխիո Ռամոսի՝ 2 անգամ 11-մետրանոց նշակետից վրիպելու փաստին, իսպանացի մասնագետն ասել է․ «Ռամոսի անհաջողություններն ինձ չեն անհանգստացնում: Նա 25 անընդմեջ 11-մետրանոց է հաջողությամբ իրացրել: Ֆուտբոլում այսպիսի բաներ պատահում են: Եթե մրցակցի դարպասին 3-րդ կամ 4-րդ 11-մետրանոցը նշանակվեր, գնդակին կրկին Ռամոսն էր մոտենալու»:
Շվեյցարացիներն A լիգայի 4-րդ խմբում վաստակել են 3 միավոր և զբաղեցնում են վերջին՝ 4-րդ հորիզոնականը: Իսպանիայի հավաքականն 8 միավորով ընթանում է 2-րդ տեղում: Այս մրցակիցների՝ առաջին շրջանում կայացած խաղում Լուիս Էնրիկեի գլխավորած թիմը նվազագույն հաշվով հաղթանակ էր տոնել:
Սերխիո Ռամոսը հավաքականների մակարդակով ամենաշատ հանդիպում անցկացրած եվրոպացին է