Մեկնարկում է VBET Հայաստանի Պրեմիեր լիգայի 13-րդ տուրը: Ձեր ուշադրությանն ենք ներկայացնում տուրի 5 հանդիպումներին վերաբերող ամենահետաքրքիր ու ամենաուշագրավ փաստերը:
ԲԿՄԱ – «ՎԱՆ»
4 նոյեմբերի, ժ.16:00, Երևան, Ֆուտբոլի ակադեմիայի մարզադաշտ
1 խաղ, որում հաղթել է «Վանը», խփած և բաց թողած գոլերի հարաբերակցությունը՝ 0-1
1-ին շրջան. 19.08.2021 «Վան» 1-0 ԲԿՄԱ
Գոլը՝ 1-0՝ Էմանուել Միրեկու Ատտահ 89՛:
ԲԿՄԱ՝ 10-րդ տեղ (3 միավոր), «Վան»՝ 8-րդ տեղ (9 միավոր):
Հետաքրքիր 5 փաստ՝ հանդիպմանն ընդառաջ
- ԲԿՄԱ-ն նախորդ տուրում ձախողվեց՝ 5 անպատասխան գնդակ ընդունելով «Նոայից»: ԲԿՄԱ-ն առաջնությունում խոշոր հաշվով 2-րդ պարտությունը կրեց: Այդ կարգի առաջին պարտությունը բանակայինները կրել էին առաջնության մեկնարկային խաղում՝ 4 անպատասխան գնդակ ընդունելով «Փյունիկից»:
- Նախորդ տուրը չափազանց անհաջող դասավորվեց նաև «Վանի» համար, որն «Ալաշկերտի» հետ մրցավեճում 4 անպատասխան գնդակ ընդունեց սեփական դարպասը: «Վանն» ընթացիկ առաջնությունում խոշոր հաշվով 2-րդ պարտությունը կրեց: Առաջինը թիմը կրել էր «Սևանից» առաջնության մեկնարկային խաղում (2-5): «Ալաշկերտից» կրած պարտությունը «Վանի» համար նախորդ առաջնությունում «Նոայի» հետ խաղում գրանցված ամենախոշոր հաշվի ռեկորդի կրկնությունն էր:
- VBET ՀՊԼ-ում մրցակիցների առաջին հանդիպումն ավարտվեց «Վանի» նվազագույն հաշվով հաղթանակով: Իսկ ահա Առաջին խմբի առաջնությունում թիմերը հանդիպել էին 2019/20թթ. մրցաշրջանում: 2019թ. օգոստոսի 27-ին ֆուտբոլի ակադեմիայի մարզադաշտում կայացած խաղում «Վանը» 4 անպատասխան գնդակ էր խփել ԲԿՄԱ-ի դարպասը: Վիգեն Բեգոյանը դարձել էր դուբլի հեղինակ, մեկական անգամ էլ աչքի էին ընկել Ուիլֆրեդ Կուասի Էզան և Նիկիտա Անդրեևը:
2020թ. մայիսի 31-ին Չարենցավանում կայացած խաղում գրանցվել էր ոչ-ոքի՝ 1-1: «Վանից» գոլի հեղինակ էր դարձել Ստեֆան Աջումանին, ԲԿՄԱ-ից պատասխան գնդակը խփել էր Նարեկ Գրիգորյանը:
- ԲԿՄԱ-ի լավագույն ռմբարկուն Գրենիկ Պետրոսյանն է, որի հաշվին 3 գոլ է գրանցված: 2 անգամ աչքի է ընկել Միքայել Միրզոյանը:
- «Վանի» կազմում 4 գնդակով լավագույն ռմբարկուն «Արարատից» տեղափոխված փորձառու Զավեն Բադոյանն է, որի հաշվին VBET ՀՊԼ-ում ընդհանուր առմամբ 46 գոլ է գրանցված: