Ամերիկացի երգչուհի, պրոդյուսեր և գրող Ջոաննա Սթինգրեյը, որը ծանոթ էր բազմաթիվ խորհրդային ռոք երաժիշտների, ՌԻԱ Նովոստիին ասել է, որ նախատեսում է գիրք թողարկել՝ նվիրված Кино խմբի լիդեր Վիկտոր Ցոյի ծննդյան 60-ամյակին:

Ռուսաստանում այս պահին լույս է տեսել գրողի հինգ գիրք՝ «Стингрей в Стране Чудес», «Стингрей в Зазеркалье», «Русский рок. История. Фотографии. Интервью. Документы», «Подлинная история русского рока» և «Русский рок: Конец андеграунда»: Աշխատանքները նվիրված են ամերիկուհու՝ Խորհրդային Միություն կատարած ճանապարհորդություններին և մինչ այժմ հրատարակվել են ժամանակագրական հաջորդականությամբ:

«Ես կշեղվեմ իմ գրքերի հրատարակման ժամանակագրական հաջորդականությունից՝ հաշվի առնելով այն հանգամանքը, որ հաջորդ տարի՝ հունիսին, Վիկտոր Ցոյը կարող էր դառնալ 60 տարեկան: Իմ հաջորդ գիրքն ամբողջությամբ նվիրված է լինելու Վիկտորին, ես ուզում եմ հարգանքի տուրք մատուցել նրան, որպես իմ հիանալի ընկերոջ»,- ասել է Սթինգրեյը:

Երգիչ և երգահան Վիկտոր Ցոյը մահացել է 1990 թվականի օգոստոսի 15-ին՝ ավտովթարից: