«Ինտերի» գլխավոր տնօրեն Ջուզեպե Մարոտան խոսել է իտալական ակումբի և Դանիայի հավաքականի կիսապաշտպան Քրիստիան Էրիկսենի հետ տեղի ունեցած միջադեպի մասին: Խաղացողը կորցրել էր գիտակցությունը ԵՎՐՈ 2020-ի խմբային փուլում Ֆինլանդիայի ընտրանու դեմ կայացած հանդիպման ժամանակ (0-1):
«Քրիստիանը քիչ առաջ հաղորդագրություն է ուղարկել «Ինտերի»՝ WhatsApp-ի խումբ: Մենք լավատեսությամբ ենք նայում նրա ապագային, հավաքականի աշխատակիցները մեզ հայտնեցին, որ իրավիճակը վերահսկողության տակ է»,- Մարոտայի խոսքերը մեջբերում է հեղինակավոր լրագրող Ֆաբրիցիո Ռոմանոյի թվիթերյան էջը:
Էրիկսենը գիտակցությունը կորցրել էր ֆինների դեմ մրցավեճի առաջին խաղակեսի վերջնամասում, երբ նրա թիմակիցը եզրային նետում էր կատարում: Բժիշկներն անմիջապես մտել են խաղադաշտ՝ փորձելով ուշքի բերել կիսապաշտպանին: Էրիկսենին ավելի քան 10 րոպե անց Դանիայի հավաքականի ֆուտբոլիստների ուղեկցությամբ դուրս էին բերել խաղադաշտից:
Սիմոն Կյերն է փրկել Էրիկսենի կյանքը՝ հերոսական գործողություններով
