Դանիացի կիսապաշտպան Քրիստիան Էրիկսենը մարզվել է Ամստերդամի «Այաքսի» երկրորդ թիմի հետ՝ հաղորդում է ակումբի մամուլի ծառայությունը:
Էրիկսենն աշխատում է մարզավիճակ հավաքել մինչև նոր թիմ գտնելը:
«Ես շատ ուրախ եմ, որ այստեղ եմ: «Այաքսում» ես ճանաչում եմ մարդկանց, ինձ թվում է, որ տուն եմ վերադարձել, քանի որ երկար ժամանակ անցկացրել եմ այստեղ: Բոլոր հարմարությունները հասանելի են, և «Յոնգ Այաքսի» հետ ես կարող եմ բարձր մակարդակով մարզվել: Ես ցանկանում եմ հնարավորինս շուտ լինել իմ լավագույն մարզավիճակում, որպեսզի երբ նոր ակումբ գտնեմ, կարողանամ լավ հանդես գալ այնտեղ»,- նշել է դանիացի կիսապաշտպանը:
«Այաքսի» երկրորդ թիմի մարզիչ Ջոն Հեյթինգան խոսել է Էրիկսենի վերադարձի մասին.
«Եթե այս իրավիճակում ակումբի դուռը թակում է նախկին խաղացողը, մենք որևէ խնդիր չունենք: Իհարկե, նա վերադարձել է: Հիանալի է, որ նա կարող է մարզվել մեզ հետ: Քրիստիանը Ֆուտբոլիստ է, որն օրինակ է մեր տղաներից շատերի համար, ոգեշնչման աղբյուր է երիտասարդների համար, որպեսզի քայլ առաջ կատարեն»:
Հիշեցնենք, որ Քրիստիան Էրիկսենը 2008-2010 թվականներին եղել է «Այաքսի» համակարգում՝ հանդես գալով Մ19 տարեկանների և հիմնական թիմի կազմում:
Ավելի վաղ հայտնել էինք, որ Էրիկսենը համաձայնության է եկել անգլիական «Բրենթֆորդի» հետ:
Հավելենք՝ 2021 թվականի հունիսին Էրիկսենը սրտի կանգ էր ունեցել ԵՎՐՈ 2020-ի խմբային փուլի առաջին տուրի Դանիա - Ֆինլանդիա (0:1) հանդիպման ժամանակ, որից հետո կիսապաշտպանի սրտի աշխատանքը կարգավորվում է դեֆիբրիլյատորով։ Այդ դեպքից հետո դանիացին խաղադաշտ դուրս չի եկել: Վերջերս նա հեռացել է Միլանի «Ինտերից», քանի որ Ա Սերիան, դեֆիբրիլյատորի կիրառմամբ պայմանավորված, չէր թույլատրում ֆուտբոլիստին մրցաշարի շրջանակում հանդիպում անցկացնել:
